La Regenza ha approvà ina contribuziun dad 1,45 milliuns francs per realisar in post spezialisà per la transfurmaziun digitala dal turissem grischun. Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun.

Per interpresas turisticas e per lur collavuraturas e collavuraturs èsi ina sfida da s'occupar da l'incumbensa cumplexa da la transfurmaziun digitala. Il «Post spezialisà per la transfurmaziun digitala dal turissem grischun» duai intermediar las enconuschientschas necessarias. La direcziun da quest post spezialisà ha la Regenza surdà a l'Uniun GRdigital en furma d'ina incarica da prestaziun.

La finamira da quest project da pilot ch'è limità a 4 onns è quella da qualifitgar las collavuraturas ed ils collavuraturs dal sectur turistic cun enconuschientschas, per ch'ellas ed els possian realisar las dretgas strategias digitalas en lur interpresas. Il post spezialisà duai porscher emprimas cussegliaziuns specificas per la clientella, intermediar las cumpetenzas necessarias ed intensivar la transfurmaziun digitala en il turissem. Cumplementarmain duai vegnir elavurà in instrument d'intermediaziun orientà a la pratica cun cuntegns curatads – ina spezia da «Wikipedia» per la digitalisaziun dal turissem grischun, cun enconuschientschas e cun cuntegns multifars.

Ulteriuras infurmaziuns: https://grdigital.digital

La Regenza ha incumbensà la Scola auta da pedagogia dal Grischun (SAPGR) da realisar il project «Civica». «Civica» è in med d'instrucziun en trais linguas per il rom Instrucziun civica sin il stgalim secundarII

In med d'instrucziun triling per il rom Instrucziun civica davart il Grischun sco er sia trilinguitad uffiziala e vivida van fitg bain a prà cun il giubileum «500 onns Stadi liber da las Trais Lias», che vegn festivà quest onn. Il med d'instrucziun cumpiglia plirs moduls e duai intermediar las enconuschientschas da basa davart il stadi svizzer e grischun. Uschia duai vegnir sveglià l'interess per la politica en general, per ils dretgs politics, per ils process politics e per uffizis politics. Ils custs da quest project importan circa 1,71 milliuns francs.

Per la perioda d'uffizi dal 1. da fanadur 2024 fin ils 30 da zercladur 2028 ha la Regenza reelegì Yvonne Altmann (Arosa), Samuele Censi (Grono), Alessandro Della Vedova (San Carlo), Georg Fromm (Partenz/Tavau), Kathrin Schläpfer (Tusaun) e Livio Zanetti (Landquart) en il cussegl consultativ da la Viafier retica. Ultra da quai ha ella elegì Céline Meury (Glion), Mirko Pianta (Casti), Stefan Sieber (San Murezzan) ed Aita Zanetti (Scuol) sco novas commembras e novs commembers dal cussegl. Tar las elecziuns en il cussegl consultativ vegni resguardà, che las differentas regiuns d'urari sajan represchentadas commensuradamain.

Il cussegl consultativ fa recumandaziuns davart svilups architectonics, tecnics u commerzials da la Viafier retica per mauns dal cussegl administrativ. La Regenza sco er il Cussegl grond elegian mintgamai diesch commembras e commembers en il cussegl, e quai mintgamai per quatter onns.

La Regenza ha prendì enconuschientscha dal fatg, ch'ils suandants projects federals vegnan suttamess a la votaziun dal pievel dumengia, ils 22 da settember 2024:

• Iniziativa dal pievel dals 8 da settember 2020 «Per l'avegnir da nossa natira e da nossa cuntrada (Iniziativa da la biodiversitad)»;
• Midada dals 17 da mars 2023 da la Lescha federala davart il provediment professiunal per vegls, survivents ed invaliditad (LPP) (refurma dal provediment professiunal).

Sin plaun chantunal vegni votà davart la suandanta fatschenta:

• Nov center d'instrucziun da la protecziun civila Meiersboda, Churwalden