La Regenza ha concedì a la secziun Winterthur dal Club alpin svizzer (CAS) ina contribuziun da maximalmain 200 000 francs ord la finanziaziun speziala Sport per renovar e per engrondir la chamona da Cavardiras CAS. Ils custs totals da quest project èn budgetads cun 3,5 milliuns francs. Gia l'avust 2023 aveva la Regenza garantì a la secziun Winterthur dal CAS ses sustegn finanzial per renovar la chamona da Cavardiras CAS, quai en il rom da la Nova politica regiunala da la Confederaziun.

La secziun Winterthur dal CAS posseda e tgira la chamona da Cavardiras CAS. Quella è situada sin 2649 meters sur mar, en il nord da Mustér sin in grip. La chamona existenta duai vegnir sanada ed engrondida en moda moderada, effizienta e persistenta sco er schanegiond las resursas ed observond ils basegns actuals e la limita dals custs. En quest connex duain vegnir resguardads ils aspects ecologics, ed ils indrizs ch'èn da renovar duain vegnir adattads al pli nov stadi da la tecnica. L'atun 2024 èsi previs da cumenzar cun las lavurs da construcziun.

La Regenza ha approvà il project «Renovaziun dal rempar da lavinas Albanas, 3. etappa» a Zuoz. Per quest intent ha ella deliberà ina contribuziun chantunala da 495 000 francs.

Il rempar da lavinas Albanas sa chatta sur il vitg da Zuoz e protegia il territori d'abitadi. Var 65 pertschient dals paralavinas èn implants da betun ch'èn vegnids construids ils onns 1950 e 1960. Ils paralavinas pli novs èn implants d'atschal. En il rom da las inspecziuns annualas èn vegnids constatads gia dapi in temp pli lung donns vi dals implants da betun. Ils ultims onns èn quests donns s'augmentads uschè fitg, ch'i vegn ad esser necessari da remplazzar ils implants da betun ils proxims onns. Las duas etappas precedentas han cumpiglià la demontascha dals implants da betun e da las saivs cunter cuflads che n'eran betg pli intactas sco er la construcziun da pli che 2300 meters novs paralavinas d'atschal e da diesch parascuflads. En il rom da la terza ed ultima etappa duain ussa vegnir remplazzads ils ultims implants da betun defects e serradas largias.

La Regenza ha approvà il project collectiv «Reparaziun d'ovras da protecziun 2024» da differentas vischnancas, da la Viafier retica e da l'Uffizi da construcziun bassa dal Grischun. Plinavant ha ella concedì ina contribuziun chantunala maximala da circa 4,79 milliuns francs per realisar quel.

Il project ha la finamira da conservar ovras da protecziun existentas cunter privels da la natira cun mantegnair il standard oriund, sco er da meglierar l'effect da quests stabiliments. Questas mesiras da mantegniment èn indispensablas per mantegnair l'effect da protecziun e per betg augmentar la ristga da privels da la natira per ils abitadis e per las infrastructuras da traffic. En il rom dal project collectiv vegnan reparads 35 objects entaifer 2 onns. Tut en tut èn vegnids budgetads 6,3 milliuns francs per realisar il project.

Glista dals projects d'ovras da protecziun 2024

Ord la finanziaziun speziala Sport (FS Sport) ha la Regenza concedì pliras contribuziuns a centers da trenament regiunals e naziunals che han lur sedia e lur activitad principala en il chantun Grischun. Plinavant ston ils centers da trenament esser previs en il concept da juniors da la federaziun naziunala e pudair cumprovar ch'els survegnan ina contribuziun a la promoziun da juniors da Swiss Olympic. A tut en tut 37 centers da trenament ha la Regenza uschia garantì contribuziuns da totalmain 750 000 francs.

© Vischnanca da Landquart