Sut l'ensaina da la mobilitad: dal vitg da purs a la metropola. Uschia festivescha Tavau ils 20 da fanadur 2024 il Bundstag. Il program da festa varià porscha debattas, culinarica e concerts da tut gener.

Tavau fa festa. Sco chapitala da la Lia da las Diesch Dretgiras e sco in dals trais lieus principals dals deputads preschenta Tavau ina nova interpretaziun dal Bundstag tradiziunal. Cun in bainvegni festiv da la cussegliera guvernativa Carmelia Maissen a las 10.00 en la chasa communala da Tavau.

Debattas da Tavau, en la Stiva gronda da la chasa communala, a las 10.00
La Lia da las Diesch Dretgiras, cun il president communal da Tavau sco parsura da la Lia, e la cultura gualsra èn colliadas stretgamain ina cun l'autra. Ils eveniments dal passà èn ina buna occasiun per ristgar in sguard sin ils svilups en las vischnancas dad oz. Represchentantas e represchentants da la politica, da l'administraziun, da la cultura, dal sport e dal turissem discutan davart temas actuals. Il giubileum porscha in fundus d'istorgias e da raquints che cuntegnan puncts da referiment per discussiuns captivantas.

Promenade senza traffic cun «Walserdörfji», a partir da las 11.00
Spezialitads culinaricas ord las cuschinas grischunas da tschintg tschientaners, attracziuns sco smincar uffants, stans da vendita e preschentaziuns sin via. Il program da festa e da divertiment varià sin la Promenade senza traffic e sin l'Arkadenplatz envida da sfundrar en la cultura ed en l'istorgia. La saira carmalan concerts cun stars regiunals.

Til festiv istoric «Maletgs giagls», a las 14.00
Sa referind a l'ovra dad Ernst Ludwig Kirchner «500 Jahrfeier des Zehngerichtebunds», 1936, datti da vesair en quest til in punct culminant suenter l'auter. Cun il cortegi da las bandieras da la Lia da las Diesch Dretgiras a la testa, chaminan represchentantas e represchentants d'uniuns localas, da corporaziuns d'alp, d'instituziuns turisticas e da societads da musica ensemen cun giasts d'onur dal spartavias Kurgartenstrasse/Promenade fin al Postplatz. Maletgs giagls, unids en in cortegi da l'istorgia.

Poetry slam contest, a las 19.00
Gia la saira avant, ils 19 da fanadur 2024, concurran poetas e poets da slam a Tavau. La concurrenza plain expressiun verbala ha lieu en il rom da las festivitads dal Bundstag en il restaurant Stau.

Exposiziun ambulanta «Stgazis grischuns sin viadi»
Dals 17 fin ils 28 da fanadur envida l'exposiziun ambulanta «Stgazis grischuns sin viadi» da contemplar stgazis dal temp passà e dal preschent sin l'Arkadenplatz.
Mesemna, ils 17 da fanadur 2024 a partir da las 17.00, preschentan la Fundaziun da funtaunas da dretg svizra e l'Archiv dal stadi dal Grischun la versiun online dals protocols da las dietas ch'èn vegnids scrits dal 1567 fin il 1797. I sa tracta da la funtauna principala davart l'istorgia dal Stadi liber da las Trais Lias ch'è stà il precursur dal chantun Grischun dad oz. La preschentaziun ha lieu en il Kulturplatz Tavau ed è integrada en l'avertura da l'exposiziun ambulanta.

Il program detaglià davart il Bundstag a Tavau chattais Vus sut https://500.gr.ch/rum/event/bundstag-davos/. I vegn cusseglià da viagiar cun il traffic public. Grazia a la purschida «simpel per retour» pajais Vus ils dis da la dieta mo il viadi per ir a Tavau. Il viadi da return è gratuit fin al lieu da partenza en il Grischun.

Ulteriuras activitads da giubileum
Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.

Agiuntas:

Flyer Bundstag Tavau
Fotografia agiuntada: Tavau enturn 1870, Biblioteca da documentaziun Tavau, 31.20.53.6.

Infurmaziuns:

• Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch

• Christoph Luzi, co-manader dal project Bundstag Tavau, tel. +41 78 930 36 21, e‑mail luzi@clu-cultur.ch
• Ursin Widmer, Post spezialisà per la cultura Tavau, tel. +41 81 414 33 43, e‑mail Ursin.Widmer@davos.gr.ch