La gronda part da la populaziun fa attenziun a la sanadad corporala. La sanadad psichica percunter vegn savens laschada d'ina vart. Ma er la psica sto vegnir resguardada e tgirada. Perquai sa concentrescha il chantun sin la sensibilisaziun e sin l'infurmaziun e realisescha l'atun per la sisavla giada ils dis d'acziun per la sanadad psichica, quai sut il slogan «Co vai cun tai?».

La gronda part da la glieud fa attenziun a sia sanadad corporala e tematisescha er ella. Ma er la sanadad psichica sto vegnir resguardada e tgirada, cunzunt er, perquai che las grevezzas psichicas da bleras persunas èn s'augmentadas ils ultims onns. Pertutgadas spezialmain èn persunas da 15 fin 24 onns, cunzunt las dunnas giuvnas. Perquai èsi central da savair, co ch'ins po rinforzar resursas per la psica ed identifitgar baud grevezzas psichicas. Ins po numnadamain er sviluppar forzas da resistenza cunter grevezzas psichicas. Savens mancan dentant anc la savida u las infurmaziuns necessarias. Perquai organisescha il chantun Grischun ils dis d'acziun per la sanadad psichica; quest onn gia per la sisavla giada. Dals 7 da settember 2024 fin ils 10 d'october 2024 han lieu tut en tut 24 occurrenzas publicas en l'entir chantun.

«Co vai cun tai?»
Grevezzas psichicas pon avair furmas fitg multifaras. Ellas sa manifesteschan en connex cun la superaziun da crisas, cun in maletg saun dal corp, cun distgargias en il mintgadi, cun la cuntanschibladad permanenta u cun malsognas en la famiglia. «Las grevezzas psichicas s'augmentan. Quai vesan ins er vi dal fatg, che fin in terz da tschertas gruppas da vegliadetgna da la populaziun svizra patescha en il decurs d'in onn d'ina malsogna psichica», di Peter Peyer, schef dal Departament da giustia, segirezza e sanadad. «I dovra perquai urgentamain prevenziun, scleriment e detabuisaziun en quest sectur». Tenor l'Uffizi federal da sanadad publica tutgan malsognas psichicas tar las malsognas las pli derasadas.

Il program dals dis d'acziun per la sanadad psichica dal Grischun sa drizza perquai ad in vast public. Las occurrenzas infurmeschan, animeschan da discutar e mussan, co ch'ins po promover l'atgna sanadad psichica u la sanadad psichica dals conumans. Per sustegnair las occurrenzas ha lieu a medem temp la campagna «Co vai cun tai?». La finamira da quella è da rinforzar en la populaziun la conscienza per las atgnas situaziuns emoziunalas.

Tge signifitga sanadad psichica?
La sanadad psichica vegn definida da l'Organisaziun mundiala da la sanadad (WHO) sco stadi dal bainstar, en il qual ina persuna po trair a niz sias abilitads, dumagnar il squitsch normal da la vita, lavurar en moda productiva e fritgaivla e prestar ina contribuziun a sia cuminanza.

Chalender d'occurrenzas dals dis d'acziun per la sanadad psichica: www.wie-gehts-dir.gr.ch.

Infurmaziuns:

Denise Rudin, manadra da la partiziun Promoziun da la sanadad e prevenziun, Uffizi da sanadad, tel. +41 81 257 64 02, e‑mail Denise.Rudin@san.gr.ch