L'Uffizi da construcziun bassa dal Grischun integrescha las vischnancas, differentas interpresas dal turissem, dals fatgs da sanadad, dal commerzi e dal mastergn sco er commembras e commembers dal Cussegl grond en l'ulteriur svilup da la signalisaziun e da la communicaziun davart il stadi da las vias. Sco project da pilot ha cumenzà l'emprima da duas rundas da discussiun en l'Engiadin'Ota. La finamira da l'inscunter è stada quella, da registrar ils giavischs multifars per pudair resguardar tals, sch'ins elavura ulteriuras mesiras.

Las utilisadras ed ils utilisaders da las vias grischunas vegnan integrads activamain en l'ulteriur svilup da la communicaziun e da la signalisaziun areguard serradas da las vias, stadi da las vias ed impediments dal traffic. L'Uffizi da construcziun bassa dal Grischun ha cumenzà en l'Engiadin'Ota l'emprima da duas rundas da discussiun cun vischnancas e cun differentas interpresas dal turissem, dals fatgs da sanadad sco er dal commerzi e dal mastergn. Er commembras e commembers dal Cussegl grond da las regiuns Malögia e Bernina èn sa participads a quest inscunter.

Discurs da lavuratori diversifitgà
Sin invitaziun da l'Uffizi da construcziun bassa èn sa scuntradas l'emna passada pli che 30 persunas per l'emprim discurs da lavuratori a San Murezzan. La finamira da quest discurs è stada quella, da registrar las experientschas, ils basegns e las ideas da las differentas organisaziuns e da lur collavuraturas e collavuraturs en connex cun la communicaziun, sche vias ston vegnir serradas. Las contribuziuns preziusas e constructivas da la runda da discussiun servan a l'Uffizi da construcziun bassa a meglierar ils servetschs d'infurmaziun futurs en il senn da las utilisadras e dals utilisaders da las vias sco er da las vischnancas, da las organisaziuns e da las interpresas da la regiun.

Preschentaziun avant la stagiun d'enviern
L'emprim discurs da lavuratori ha gì lieu en in'atmosfera averta e constructiva ed ins ha rimnà numerus giavischs ed ideas. En vista a la stagiun d'enviern vegnan las gruppas d'interess e las exponentas ed ils exponents da la politica infurmads detagliadamain davart la communicaziun e la signalisaziun ed ellas ed els pon s'exprimer en chaussa. La segunda mesadad da november ha lieu in segund discurs da lavuratori en quest connex. Avant il cumenzament da la stagiun d'enviern vegnan las novaziuns lura er preschentadas a la publicitad.

Novaziuns en tut il chantun
L'avust 2024 è gia vegnì renovà cumplettamain il servetsch d'internet strassen.gr.ch. Er en il futur vegn la plattafurma ad esser l'emprim chanal per communitgar il stadi da las vias. Avant il proxim enviern vegn ultra da quai installada en parts da l'Engiadin'Ota ina nova generaziun da signals da traffic. Sin basa da las experientschas en la regiun da pilot Engiadin'Ota duain las novaziuns da la signalisaziun alura vegnir installadas pass per pass en tut il chantun.

Infurmaziuns:

Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 10.00 fin las 12.00), e‑mail Reto.Knuchel@tba.gr.ch