En la vischinanza directa dal cunfin cun il Grischun, en il Montafon, han ins cumprovà tuberculosa tar almain dus tschiervs. Per identifitgar uschè baud sco pussaivel in eventual import da la tuberculosa en il Partenz vischin e per uschia evitar ina derasaziun, vegn intensivada la surveglianza dals tschiervs en in territori d'observaziun determinà.

Ils dus tschiervs èn vegnids sajettads la fin d'avust sin il territori da l'alp Tilisuna en il Gampadelstal (Montafon). En il rom d'in program da surveglianza èn els vegnids testads sin tuberculosa cun agid da la metoda PCR – il resultat dal test è stà positiv. En il fratemp datti ulteriurs cas da suspect en il territori damanaivel dal cunfin.

Il chantun Grischun prenda mesiras
Pervia da la derasaziun da l'epidemia d'animals dal Montafon en direcziun dal Grischun ston vegnir prendidas mesiras per ina surveglianza pli intensiva, quai sin basa da l'Ordinaziun davart epidemias d'animals. En enclegientscha cun l'Uffizi da chatscha e pestga (UCP) e cun l'Uffizi federal da segirezza alimentara e fatgs veterinars (USAV) ha l'Uffizi per la segirezza da victualias e per la sanadad d'animals (USVA) perquai determinà in territori d'observaziun, nua che tschiervs sajettads e chattads morts ston vegnir examinads sin tuberculosa. Pertutgads èn ils territoris communals da Seewis, Grüsch, Schiers, Luzein, Küblis e la fracziun Saas a Claustra, che sa chattan al nordost da la Landquart.

En questa regiun determinada ston vegnir prendidas emprovas dad in terz dals tschiervs che vegnan sajettads durant la chatscha auta e durant la chatscha speziala e plinavant da tut ils tschiervs che vegnan sajettads tras prelevaziuns da tgira u che vegnan chattads morts (selvaschina che ha gì in accident u ch'è sa disgraziada). Lura ston las emprovas vegnir examinads sin tuberculosa.

La realisaziun da questas mesiras è ina sfida logistica ed ha lieu cun il sustegn da l'Uniun grischuna da chatschadras e chatschaders da patenta (UGCP) e da las chatschadras e dals chatschaders, sco er en stretga collavuraziun cun l'Uffizi da chatscha e pestga (UCP). Las mesiras han la finamira d'identifitgar a temp eventuals cas da tuberculosa, per impedir che la tuberculosa sa derasia sin la populaziun da selvaschina e vegnia transmessa sin ils effectivs d'arments.

Il scumond da pavlar è sa cumprovà e resta en vigur
Tant ils animals da niz sco er ils animals selvadis valan en Svizra sco libers da tuberculosa. Perquai ch'ina part da la populaziun da tschiervs en tschertas regiuns da l'Austria è dentant contaminada cun tuberculosa, vala dapi l'onn 2016 in scumond per persunas privatas da pavlar selvaschina d'ungla (tschiervs, chavriels, chamutschs, capricorns) en la regiun da cunfin cun il Vorarlberg e cun il Tirol. Il scumond è vegnì prolungà ils 3 da zercladur 2024 per ina durada illimitada.

Las mesiras preventivas èn sa cumprovadas fin ussa. Quai mussa il «Rapport davart la surveglianza da la tuberculosa tar ils tschiervs en la Svizra Orientala ed en il Principadi dal Liechtenstein», che l'Uffizi federal da segirezza alimentara e fatgs veterinars (USAV) publitgescha mintga onn.

Tge è tuberculosa?
La tuberculosa è ina malsogna infectusa bacteriala cun in decurs cronic. Animals selvadis, animals da niz ed umans pon survegnir questa malsogna. L'agent patogen dominant dals cas da tuberculosa tar ils tschiervs en l'Austria dal Vest ed en la Germania dal Sid è actualmain la bacteria Mycobacterium caprae. Ella po vegnir transmessa sin arments, dentant er sin umans.Ulteriuras infurmaziuns èn disponiblas sin la pagina d'internet dal USVA sut «Tuberkulose beim Wild».

Agiunta:

Charta cun territori d'observaziun e scumond da pavlar

Infurmaziuns:

Giochen Bearth, manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 10.00 fin las 12.00), e‑mail Giochen.Bearth@alt.gr.ch