La Regenza ha elegì Martina Rehli, secretaria generala dal Departament d'infrastructura, energia e mobilitad, ed Evelyn Pfeifer, economa per finanzas e participaziuns dal Departament da finanzas e vischnancas, sco novas commembras da la Cumissiun da taglia sin ovras idraulicas. Ellas remplazzan Dr. Christian Tannò ed Amos Pesenti che bandunan il gremi. La Regenza als engrazia per ils servetschs prestads.

Tenor la legislaziun federala èsi pussaivel d'incassar tschains d'aua per l'utilisaziun da las forzas idraulicas. Correspundentamain incassescha il chantun Grischun la mesadad dal tschains d'aua maximal en furma d'ina taglia sin ovras idraulicas. Taxada vegn tala da la Cumissiun da taglia sin ovras idraulicas sin basa da las producziuns annualas annunziadas e controlladas da las ovras electricas che ston pajar tschains d'aua. Per in onn da producziun ordinari po il chantun Grischun calcular cun taxas da var 60 milliuns francs a favur da las finanzas publicas.

La Regenza ha prendì enconuschientscha dal fatg, ch'il suandant project federal vegn suttamess a la votaziun dal pievel dumengia, ils 9 da favrer 2025:

• Iniziativa dal pievel dals 21 da favrer 2023 «Per in'economia responsabla entaifer las limitas dal planet (Iniziativa da responsabladad per l'ambient)».

Sin plaun chantunal n'èn previs nagins projects da votaziun ils 9 da favrer 2025.