Per garantir il provediment decentral da la sanadad da la populaziun grischuna er en l'avegnir, vul la Regenza pudair conceder emprests transitorics als ospitals en las regiuns da provediment da la sanadad. A medem temp duain las regiuns da provediment da la sanadad er survegnir dapli libertad organisatorica. La Regenza ha perquai avert la consultaziun tar la revisiun parziala da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira.

Pervia da la mancanza da bonitad èsi per ils blers ospitals publics grischuns praticamain exclus – u pussaivel mo cun tschains fitg auts (supplement da ristga) – da survegnir sin il martgà da chapital emprests per garantir la liquiditad. Perquai vul il chantun stgaffir la pussaivladad da conceder emprests transitorics als ospitals publics en cas d'ina crisa finanziala. Per quest intent propona la Regenza in credit d'impegn general da 100 milliuns francs.

Ospitals che giavischan in emprest, ston suttametter a la Regenza in plan da mesiras che preschenta en spezial, co ch'i resulta a curta fin a media vista puspè in resultat da gestiun positiv.

Dals emprests concedids profitan en emprima lingia las vischnancas ch'èn las purtadras dals ospitals pertutgads. Senza emprests stuessan las vischnancas – sco purtadras dal provediment public da la sanadad – star bunas dal tuttafatg sulettas per lur ospitals en situaziuns da crisa. Perquai duain las vischnancas surpigliar 50 pertschient da las perditas che resultan eventualmain tras la concessiun dals emprests. Correspundentamain duain emprests vegnir concedids mo cun il consentiment da la maioritad da las vischnancas da la regiun da provediment da la sanadad respectiva.

Pussibilitar la transfurmaziun a centers da sanadad
Pervia da l'ambient problematic, pervia dals svilups pretensius e pervia da las relaziuns finanzialas difficilas duain las regiuns da provediment da la sanadad plinavant survegnir la pussaivladad da transfurmar lur ospitals – en cas da basegn – en centers da sanadad. Quai vul dir ch'i pudessan vegnir furnidas en l'avegnir mo pli prestaziuns ambulantas en l'ospital actual, senza ina purschida staziunara cun custs d'infrastructura e da persunal respectivs. En quest connex vegn er introducida ina regulaziun che duai simplifitgar las decisiuns da las regiuns da sanadad, sch'i sa tracta da dumondas organisatoricas. Relevanta duai mintgamai esser ina decisiun da maioritad da las votantas e dals votants da las vischnancas d'ina regiun da provediment da la sanadad respectiva.

Il project ha la finamira d'optimar vinavant il provediment decentral da sanadad, per ch'el stettia a disposiziun a la populaziun grischuna er en l'avegnir, senza dentant deliberar las vischnancas da lur responsabladad sco purtadras dals ospitals grischuns. Igl è planisà da metter en vigur la revisiun parziala per il 1. da schaner 2026.

Ils documents da consultaziun èn ussa disponibels
La consultaziun dura dals 12 da november 2024 fin ils 16 da december 2024. Ils documents respectivs èn disponibels sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.

Infurmaziuns:

Hans Peter Risch, secretari general per il sectur Sanadad, protecziun da la populaziun e militar, Departament da giustia, segirezza e sanadad, tel. +41 81 257 25 04 (cuntanschibel da las 11.00 fin las 12.00), e‑mail Hans-Peter.Risch@djsg.gr.ch

Responsabladad: Regenza