La Cumissiun per economia e taxas (CET) dal Cussegl grond ha predeliberà la missiva da la Regenza davart la realisaziun da la taglia minimala da la OECD en il chantun Grischun e propona al Cussegl grond d'approvar tala.

Sut la direcziun dal president da la cumissiun Oliver Hohl ed en preschientscha dals cussegliers guvernativs Marcus Caduff, schef dal Departament d'economia publica e fatgs socials, e Martin Bühler, schef dal Departament da finanzas e vischnancas, ha la CET predeliberà la missiva da la Regenza davart la realisaziun da la taglia minimala da la OECD en il chantun Grischun. Il project cuntegna d'ina vart ina revisiun parziala da la Lescha da taglia (cumpart da las vischnancas a la taglia cumplementara da la Confederaziun) ed ina revisiun parziala da la Lescha per promover il svilup economic en il chantun Grischun (credits da taglia per promover il Grischun sco plazza economica). La realisaziun da la taglia minimala da la OECD vul principalmain imponer ina taglia d'almain 15 pertschient a las interpresas ch'èn activas sin plaun internaziunal e che han ina svieuta annuala d'almain 750 milliuns francs. La Confederaziun garantescha questa imposiziun minimala da taglia, uschenavant che quai è necessari, cun agid d'ina uschenumnada taglia cumplementara. Las entradas or da la taglia cumplementara transferescha la Confederaziun per 75 pertschient a quels chantuns, en ils quals las interpresas pertutgadas èn suttamessas a la taglia.

Cumpart da las vischnancas incontestada
En la missiva al Cussegl grond propona la Regenza da fixar la cumpart da las vischnancas a la taglia cumplementara da la Confederaziun a 25 pertschient. Suenter che questa proposta ha anc evocà reacziuns cuntraversas a chaschun da la consultaziun, sustegna la CET unanimamain la clav da repartiziun proponida. En il chantun Grischun dastgass mo in pugn plain firmas esser pertutgà da la taglia minimala da la OECD. La Regenza quinta cun entradas supplementaras da paucs milliuns francs per il chantun.

Credits da taglia per promover l'attractivitad dal lieu
La taglia minimala da la OECD ha ina influenza negativa sin l'attractivitad dal lieu, perquai ch'ella restrenscha la concurrenza fiscala interchantunala ed internaziunala da persunas giuridicas sur ils gudogns d'interpresa. Perquai propona la Regenza da stgaffir las basas per credits da taglia, per promover uschia l'attractivitad dal Grischun sco plazza economica. Da tals credits da taglia pon las interpresas profitar, sch'ellas fan investiziuns per augmentar la valurisaziun en il chantun, per stgaffir plazzas da lavur, per promover la forza da perscrutaziun, da svilup ed d'innovaziun u per meglierar la persistenza ecologica. Er questa via para correcta per la CET. Ella sustegna unanimamain la proposta da la Regenza da stgaffir las basas per credits da taglia.

Il Cussegl grond vegn a tractar il project en la sessiun da december 2024.

Infurmaziuns:

Oliver Hohl, president da la Cumissiun per economia e taxas, tel. +41 79 651 51 78, e‑mail oliver.hohl@weberprevost.ch

Responsabladad: Cumissiun per economia e taxas / Cussegl grond