Durant duas sesidas d'in entir di ha la Cumissiun per furmaziun e cultura (CFC) predeliberà il project da la Regenza tar la revisiun parziala da la Lescha da scola per mauns dal Cussegl grond. La missiva cumplexa è vegnida discutada intensivamain e per part en moda cuntraversa.

Sut il presidi da la presidenta da la cumissiun Gabriela Menghini-Inauen ed en preschientscha dal president da la Regenza Jon Domenic Parolini (schef dal Departament d'educaziun, cultura e protecziun da l'ambient, DECA) ha la CFC predeliberà ils 10 ed ils 30 d'october 2024 la missiva da la Regenza tar la revisiun parziala da la Lescha da scola. Cun quest project duai la Lescha da scola ch'è vegnida revedida l'ultim giada avant 12 onns en differents secturs vegnir adattada a la situaziun ch'è sa midada dapi lura pervia da svilups socials, tecnologics e da la politica da furmaziun. En la revisiun parziala realisescha la Regenza a medem temp pliras incumbensas ch'èn vegnidas acceptadas dal Cussegl grond (cf. communicaziun a las medias dals 19-09-2024).

Discussiuns cuntraversas
La cumissiun beneventa la missiva sco urgenta ed impurtanta. Il project regla temas fitg differents e vegn uschia discutà en moda detagliada e per part cuntraversa da la CFC durant ils 2 dis da sesida. Al DECA vegnan fatgas numerusas dumondas per pudair valitar meglier las consequenzas dal project e per concretisar las basas da decisiun. Bain restan singulas posiziuns dispitaivlas er suenter la predeliberaziun, en blers puncts sustegna la cumissiun la finala dentant unanimamain il project da revisiun.

Unitad en connex cun la salarisaziun minimala e cun la scola en l'ospital
Incontestadas èn tant l'adattaziun da las tariffas da salarisaziun minimalas da las persunas d'instrucziun a la media da la Svizra orientala sco er l'assimilaziun da las tariffas da salarisaziun minimalas dal stgalim da scolina a quellas dal stgalim primar. In sustegn unanim chattan er las basas legalas proponidas per manar scolas en ospitals en il sectur da la scola populara sco er per la participaziun finanziala dal chantun per champs da classa, per emnas da project e per excursiuns. En divergenza da la missiva propona la cumissiun ultra da quai unanimamain in augment pli grond da la pauschala per la scola regulara e pia ina participaziun pli gronda dal chantun vi dals custs.

L'obligatori da scolina e las classas d'introducziun restan temas dispitaivels
Ina minoritad da la cumissiun n'è betg d'accord cun l'introducziun d'in obligatori da scolina. Propostas da maioritad e da minoritad datti er tar las propostas da la Regenza concernent la represa da las classas d'introducziun d'ina vart sco er concernent furmas da scolaziun en il sectur simpel da la pedagogia speziala da l'autra vart. Tar omadus temas sa tracti da midadas, cun las qualas la Regenza realisescha incumbensas dal Cussegl grond ch'ella ha acceptà.

Il Cussegl grond vegn a tractar il project en la sessiun da december 2024.

Infurmaziuns:

Presidenta da la cumissiun Gabriela Menghini-Inauen, tel. +41 79 714 40 81 (cuntanschibla da las 10.00 fin las 12.00)