L'Uffizi da construcziun bassa dal Grischun integrescha las vischnancas, differentas interpresas dal turissem, dals fatgs da sanadad, dal commerzi e dal mastergn sco er commembras e commembers dal Cussegl grond en l'ulteriur svilup da la signalisaziun e da la communicaziun davart il stadi da las vias. Al cumenzament da l'emna ha gì lieu a San Murezzan il segund discurs da lavuratori, cun l'intent d'optimar las futuras prestaziuns da communicaziun, en cas che las vias ston vegnir serradas. En il focus èn stadas las enconuschientschas da l'emprima runda da discussiun e la preschentaziun da la nova signalisaziun d'enviern per l'Engiadin'Ota.
Las numerusas ideas ed ils blers basegns ch'èn vegnids annunziads durant l'emprima runda da discussiun (guardar communicaziun a las medias dals 11 d'october 2024) han dà a l'Uffizi da construcziun bassa (UCB) infurmaziuns preziusas per sviluppar vinavant las prestaziuns da communicaziun en connex cun il stadi da las vias.
Gestiun dal traffic durant serradas da vias
Er il segund discurs da lavuratori ha sveglià in grond interess tar las var 30 participantas e participants. Il UCB ha mussà, co ch'el vul resguardar cun ils proxims pass ils giavischs ch'èn vegnids exprimids. In tema central èn stadas la gestiun dal traffic e las zonas da spetga che duain eventualmain vegnir endrizzadas, sche las vias ston vegnir serradas. Il UCB e la Polizia chantunala han examinà questa idea, na vesan dentant a curta vista anc nagina pussaivladad realistica per implementar tala. Per tuttina tegnair quint dal basegn da diriger sistematicamain il traffic, sche las vias ston vegnir serradas, planiseschan las persunas spezialisadas d'engaschar per la stagiun d'enviern 2024/2025 persunal che dirigia il traffic a las rundellas tranter San Murezzan e Segl. Sche necessari dirigissan las forzas d'acziun al lieu ils vehichels enavos en il territori da San Murezzan, Samedan u Puntraschigna, per uschia distgargiar la via chantunala e per garantir la circulaziun dal traffic public sco er da las organisaziuns a glisch blaua.
Nova generaziun da signals dad LED en funcziun sco emprova da pilot
In ulteriur giavisch che bleras participantas e blers participants da la discussiun han exprimì, è quel d'optimar la communicaziun e la signalisaziun dal stadi da las vias. Il UCB s'engascha dapi var trais onns per meglierar la signalisaziun d'enviern en tut il chantun, quai collià cun in'emprova da pilot a Tumein ed a Glion cun novas tavlas dad LED da pliras colurs che pon vegnir reguladas en moda flexibla. Per la stagiun d'enviern 2024/2025 vegn questa emprova da pilot extendida sin l'Engiadin'Ota: Questa emna han ins prendì en funcziun ils emprims quatter signals dad LED tranter Punt Muragl e Castasegna.
Infurmaziuns pli vastas e pli detagliadas
Cun las novas tavlas dad LED èsi pussaivel da preschentar signals da traffic, texts e simbols ed uschia da mussar infurmaziuns differenziadas davart il stadi da las vias e davart eventuals impediments. Latiers tutgan per exempel serradas planisadas, temps e lieus, nua ch'i dat impediments. Cun plazzar ils signals en lieus strategics vul il UCB tegnair quint dal giavisch da survegnir infurmaziuns pli detagliadas, pli vastas e pli actualas e da meglierar – sche pussaivel – la planisabladad per las utilisadras ed ils utilisaders da la via.
Infurmaziun gratuita sin il telefonin
Gia durant la stad ha l'Uffizi da construcziun bassa modernisà la plattafurma strassen.gr.ch. Ella porscha oz ina meglra visualisaziun sin ils apparats mobils, infurmaziuns pli multifaras en pliras linguas e dumogna marcantamain dapli consultaziuns. Las infurmaziuns actualas pon ins abunar sco e-mail, sco communicaziun push u sco SMS gratuit. Las infurmaziuns pon er vegnir mussadas sin paginas d'internet u sin sistems d'infurmaziun da terzs; l'Uffizi da construcziun bassa metta a disposiziun interfatschas correspundentas.
Emprender da las experientschas
Suenter l'emprima stagiun d'enviern vegn il UCB ad evaluar ils resuns e las experientschas davart ils novs signals e davart las novas metodas da communicaziun ed a manar ulteriurs discurs. Las enconuschientschas fatgas vegnan resguardadas en ils ulteriurs pass per realisar la nova signalisaziun. Il UCB ha en mira da metter en funcziun en l'avegnir ils novs signals dad LED en tut il chantun.
Auskunftsperson:
Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 8.30 fin las 9.45), e‑mail Reto.Knuchel@tba.gr.ch
Responsabladad: Uffizi da construcziun bassa