La Regenza ha mess en vigur retroactivamain per il 1. da schaner 2025 las revisiuns parzialas da la Lescha davart il sustegn da persunas basegnusas concernent las Svizras ed ils Svizzers cun ina moda da viver nomada sco er concernent la restituziun da prestaziuns da sustegn tenor il dretg d'agid social. Il Cussegl grond aveva concludì questas duas revisiuns parzialas en la sessiun d'october 2024. Il termin da referendum per ils dus relaschs è scadì ils 28 da schaner 2025. Entaifer quest termin n'èn vegnids inoltrads nagins referendums.

Per Svizras e Svizzers cun moda da viver nomada duai star a disposiziun ina purschida suffizienta da plazzas da transit e da staziunament. Cun la segunda revisiun parziala concernent la restituziun vegnan stgaffidas reglas unitaras e cleras davart l'obligaziun da restituziun sco er las excepziuns latiers, per exempel per persunas giuvnas creschidas durant in'emprima scolaziun.

A l'Associazione 100% (bio) Valposchiavo ha la Regenza concedì ina contribuziun chantunala da maximalmain 133 024 francs per ils dus ulteriurs projects parzials «La Sella Sagl» e «La Valle dei sapori», che duain vegnir realisads en il rom dal project general «100% (bio) Valposchiavo», quai cun resalva che la Confederaziun concedia ina contribuziun federala da 139 093 francs e che la finanziaziun restanta saja garantida

«100% (bio) Valposchiavo» è in project voluminus per il svilup regiunal (PSR), ch'è vegnì lantschà l'onn 2019. Il PSR che cumpiglia actualmain 14 projects parzials, vegn ussa cumplettà cun dus novs projects parzials: il bain da vignas La Sella e la chascharia La Valle dei sapori. La Sella ScRL planisescha da crear ina purschida da vins biologics indigens da la Val Puschlav sco er da vins regiunals da la Val Puschlav e da la Valtellina. En il rom dal PSR duai vegnir sanà in tschaler da vin istoric a Poschiavo e vegnir cumprà l'equipament ch'i dovra per elavurar las ivas. Planisads èn locals per far vin e per conservar las buttiglias da vin sco er ina butia per la vendita directa. En il rom dal project «La Valle dei sapori» vegn in local da l'anteriura chascharia a Campascio (vischnanca da Brusio) sanà ed equipà per l'elavuraziun da latg. Il latg vegn cumprà dals purs da la regiun ed elavurà a chaschiel, robiole, ricotta, büscion e gorgonzola. Ils products vegnan distribuids da dus posts da vendita directa sco er da butias, restaurants ed hotels en la regiun ed en l'Engiadina.