La Regenza ha concedì all'uniun ibW Scola spezialisada superiura da la Svizra Sidorientala (uniun ibW) ina contribuziun chantunala da maximalmain 100 000 francs per il curs da preparaziun per l'examen professiunal federal «Digital Collaboration Specialist». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun.

Il project da furmaziun da l'uniun ibW cuntegna la cumposiziun e la realisaziun d'in curs preliminar che duai manar en il chantun Grischun a la scolaziun «Digital Collaboration Specialist» ch'è reconuschida sin plaun federal. Persunas che han reussì l'examen professiunal federal en «Digital Collaboration Specialist» prestan ina contribuziun impurtanta a l'augment da la cumpetenza digitala da persunas spezialisadas en differentas branschas ed interpresas. Tras quai vegn mantegnida la cumpetitivitad da las interpresas pitschnas e mesaunas en il chantun Grischun e la cumpetitivitad da las absolventas e dals absolvents sin il martgà da lavur.

Ulteriuras infurmaziuns: https://grdigital.digital

La Regenza ha relaschà l'Ordinaziun executiva tar la Lescha federala davart ils products da tubac e las cigarettas electronicas. L'ordinaziun entra en vigur il 1. d'avrigl 2025.

Per il 1. d'october 2024 ha il Cussegl federal mess en vigur la nova Lescha federala davart ils products da tubac e las cigarettas electronicas (LPTub). Quella cuntegna differentas prescripziuns davart la producziun e la designaziun da products da tubac e da cigarettas electronicas sco er davart la consegna e la reclama per tals products. Ils chantuns reglan l'execuziun, uschenavant che las incumbensas executivas n'èn betg vegnidas surdadas a la Confederaziun. Resguardond las prescripziuns legalas existentas e la pratica executiva da fin ussa ha la Regenza reglà l'execuziun en furma curta e concisa.

D'ina vart vala anc adina la cumpetenza da las vischnancas tenor la Lescha davart la protecziun da la sanadad en il chantun Grischun. Las vischnancas procuran che las restricziuns da far reclama sco er da consegnar e da vender tubac e products da tubac vegnian observadas. En la LPTub prescriva la Confederaziun da nov, tge restricziuns da reclama e da consegna respectivamain da vendita che valan per products da tubac e per cigarettas electronicas. Questas prescripziuns vegnan exequidas en il chantun Grischun tras las vischnancas.

Da l'autra vart vegn la Controlla da victualias da l'Uffizi per la segirezza da victualias e per la sanadad d'animals (USVA) declerada – en ina nova ordinaziun da la Regenza – sco cumpetenta per exequir las novas prescripziuns federalas da la LPTub pertutgant la producziun e la designaziun da products da tubac. Er quai correspunda a la pratica vertenta: Fin ussa exequiva numnadamain il USVA gia per gronda part questas prescripziuns. Las disposiziuns correspundentas eran numnadamain cuntegnidas fin la fin da settember 2024 en la legislaziun da victualias.

La Regenza ha mess en vigur per il 1. d'avrigl 2025, sco communitgà, l'obligaziun d'annunziar e da nettegiar bartgas (OANB) (communicaziun a las medias dals16 da december 2024). Quai per proteger las auas dad animals e da plantas exoticas invasivas (en spezial da la conchiglia quagga).

La nova prescripziun vala per bartgas immatriculadas respectivamain bartgas cun obligaziun d'immatriculaziun per cursar sin las auas dal Grischun. Manischunzas e manischunzs da bartgas ston communitgar las midadas d'ina aua en in'autra sur ina plattafurma electronica. Possessuras e possessurs da bartgas che han gì lur bartgas sco ultim en in'aua grischuna, ston annunziar quest'aua precendenta in'unica giada cun ina decleraziun persunala. Suenter avair annunzià la midada da l'aua ston las bartgas vegnir nettegiadas da manaschis ch'èn autorisads e scolads. Quels emettan ina conferma sin la plattafurma d'annunzia digitala, e las petentas ed ils petents survegnan ina permissiun per metter lur bartga en l'aua. Las cumprovas da nettegiament èn valaivlas sin plaun interchantunal, quai vul dir, la bartga po vegnir nettegiada dad x-in post da nettegiar autorisà. En cas che la bartga vegn controllada, cura ch'ella vegn messa en l'aua u sa chatta sin l'aua, sto la permissiun per metter la bartga en in'aua pudair vegnir mussada da tut temp en furma digitala u stampada. Las bartgas senza numer d'immatriculaziun sco er ils utensils da sport d'aua u da pestga vegni recumandà da nettegiar minuziusamain, mintga giada avant che midar d'ina aua en in'autra.

Dapli infurmaziuns: www.anu.gr.ch/oanb

© Eawag, Linda Haltiner

La Regenza ha elegì Leta Steck-Rauch e Manuela Gebert sco novas commembras dal cussegl d'administraziun dals Servetschs psichiatrics dal Grischun (SPGR) per la perioda d'uffizi che dura fin ils 30 da zercladur 2026.

Tina Gartmann-Albin ed Andrea Fanzun han fatg part dal cussegl d'administraziun dals SPGR dapi l'onn 2013 ed han cuntanschì l'onn 2025 la durada d'uffizi maximala. La Regenza elegia las commembras ed ils commembers dal cussegl d'administraziun tenor la Lescha davart ils Servetschs psichiatrics dal Grischun.

La Regenza ha approvà in project collectiv da differentas vischnancas cun il titel «Sanaziun d'averturas e prevenziun cunter incendis da guaud 2025». Per quest intent ha ella concedì ina contribuziun chantunala da maximalmain 14,55 milliuns francs.

Il project en discussiun cumpiglia la sanaziun da totalmain 46,8kilometers vias da guaud, da maschinas e da jeeps, ch'èn repartids sin 56 objects singuls. Tras quai vegn meglierada l'avertura da circa 6700 hectaras guauds da protecziun e da circa 2800 hectaras ulteriurs guauds. Plinavant cumpiglia quest project collectiv la construcziun d'in batschigl d'aua da stizzar fieu en la vischnanca da Tumleastga, la sanaziun da nov lieus da retratga d'aua a Valsot sco er la cumpra da material d'equipament da pumpiers specific per cumbatter incendis da guaud.