La Regenza ha prendì posiziun davart la cuntraproposta indirecta da la Confederaziun tar l'iniziativa dal pievel «Electricitad per tuttas e tuts da tut temp (Evitar in blackout)» en il rom da la consultaziun dal Departament federal per ambient, traffic, energia e communicaziun. Cun la cuntraproposta indirecta propona il Cussegl federal a las Chombras federalas d'abolir il scumond ch'è actualmain francà en la Lescha davart l'energia nucleara da construir novas ovras nuclearas e da midar ovras nuclearas existentas. Uschia duai quai da princip puspè esser pussaivel da conceder permissiuns generalas per ovras nuclearas. Cun quai duai la decisiun dal pievel da l'onn 2017, da sortir pass per pass da l'energia nucleara, pia puspè vegnir abolida.
La Regenza grischuna sustegna cleramain la finamira netto nulla e sustegna las finamiras dal clima concludidas da las votantas e dals votants svizzers ils 18 da zercladur 2023. La segirezza dal provediment daventa dentant ina sfida pli e pli gronda, cunzunt durant il mez onn d'enviern. La Regenza è da l'avis, che l'aboliziun dal scumond da construir novas ovras nuclearas na saja betg ina soluziun adattada per garantir a curta vista il provediment d'energia, perquai che talas ovras fissan realisadas pir en decennis. La preferenza ha perquai l'extensiun svelta da las energias regenerablas, en spezial da la forza idraulica, da l'energia solara e da l'energia da vent sco er da la biomassa. Il chantun Grischun sustegna la realisaziun pli svelta dals 16 projects da forza idraulica d'impurtanza naziunala sco er las mesiras legalas per optimar las proceduras. Il medem mument pretenda el la garanzia d'existenza da la producziun actuala da forza idraulica che importa gia oz quasi 60 pertschient da la producziun d'electricitad svizra.
Ultra da quai constatescha la Regenza, che dumondas essenzialas davart la planisaziun da l'energia a lunga vista sajan scleridas insuffizientamain tras la Confederaziun. Latiers tutgan il svilup dal basegn d'electricitad, l'integraziun da novas ovras nuclearas en il sistem d'energia sco er lur supportabladad economica. Il chantun Grischun pretenda perquai, che quests puncts vegnian sclerids en moda cumplessiva, avant ch'i vegnia decidì d'abolir il scumond da construir novas ovras nuclearas. Per resumar di la Regenza gea a la discussiun dal basegn d'agir, sche las basas necessarias per questa discussiun vegnan elavuradas uschè svelt sco pussaivel. L'iniziativa dal pievel «Evitar in blackout» refusa ella.
Documents da consultaziun