Il project da refurma naziunal «Svilup da la maturitad gimnasiala» vegn elavurà e cumplettà en il chantun durant ils proxims 3 onns sin basa d'in manual da project. Il cumenzament da mars 2025 ha la Regenza surdà l'incumbensa correspundenta e fixà l'organisaziun dal project. En il chantun Grischun cumenzan las scolaras ed ils scolars previsiblamain l'onn da scola 2028/2029 a partir da la 3. classa cun la scolaziun gimnasiala revedida.

La maturitad gimnasiala permetta l'access ad in studi da scola auta e metta uschia la basa per ina carriera academica prosperaivla e per surpigliar incumbensas cun responsabladad en l'economia, en la societad ed en la politica. Il project naziunal «Svilup da la maturitad gimnasiala» vegn responsà dal Departament federal d'economia, furmaziun e retschertga e da la Conferenza da las directuras e dals directurs chantunals da l'educaziun publica. El ha manà ad ina revisiun da la basa giuridica relevanta per la scolaziun da maturitad gimnasiala sco er ad ina revisiun dal plan d'instrucziun general da las scolas da maturitad gimnasiala en tut la Svizra. Tar ils elements centrals da questa refurma tutgan la garanzia a lunga vista da l'abilitad generala da studegiar, la promoziun d'ina profunda madirezza sociala sco er l'augment da la cumparegliabladad dals examens da maturitad en tut la Svizra.

Las novas basas naziunalas per la scolaziun gimnasiala èn en vigur dapi il 1. d'avust 2024 e ston vegnir realisadas dals chantuns entaifer ina fasa transitorica fixa dad 8 onns. Il cumenzament da mars 2025 ha la Regenza surdà l'incumbensa per la realisaziun en il chantun Grischun. Cun quai è vegnì mess il fundament per che las maturandas ed ils maturands grischuns sajan preparads optimalmain er en l'avegnir per las sfidas d'in studi da scola auta e per surpigliar incumbensas cun responsabladad en l'economia, en la societad ed en la politica.

Organisaziun dal project ensemen cun ils gimnasis grischuns
En il chantun succeda la revisiun da las basas revedidas en il rom d'in project da stgars 4 onns. Quai sin basa d'in manual dal project che garantescha in management dal project ordinà ed effizient. Sin il plaun strategic vegn il project manà da l'Uffizi per la furmaziun media-superiura, entant che la direcziun operativa dal project è chaussa dal rectur da la Scola chantunala grischuna e dal manader dal gimnasi d'ina scola media privata. Questa repartiziun garantescha ina represchentanza equilibrada da las scolas medias chantunalas e privatas.

Ina rolla cardinala per realisar il project en moda efficazia e durabla han las persunas d'instrucziun dals gimnasis grischuns. En gruppas da lavur cuminaivlas vegnan ellas ad elavurar ils plans d'instrucziun per ils singuls roms, quai sin basa dal plan d'instrucziun general da las directuras e dals directurs chantunals da l'educaziun publica. Uschia contribueschan ellas decisivamain a la realisaziun da la refurma en l'instrucziun. Per sustegnair las persunas d'instrucziun il meglier pussaivel èn previsas furmaziuns supplementaras adattadas specificas ed interdisciplinaras.

Tavla da lecziuns da referenza
Sco basa per l'ulteriura lavur da project ha la Regenza ordinà la tavla da lecziuns da la Scola chantunala grischuna sco tavla da lecziuns da referenza per ils gimnasis grischuns. Las novas prescripziuns dal dretg federal renunzian ad in catalog da roms fixà obligatoricamain. En il chantun Grischun duai vegnir mess en il rom d'accent in focus sin la propedeutica scientifica, quai vul dir sin ina avischinaziun al pensar e lavurar scientific. En il rom cumplementar duai vegnir nizzegiada la libertad creativa existenta. Quai per pussibilitar contexts d'instrucziun interdisciplinars che porschan a las singulas scolas novas pussaivladads concepziunalas. Questas novaziuns han la finamira da rinforzar duraivlamain la scolaziun gimnasiala en il Grischun e da porscher a las maturandas ed als maturands las meglras premissas per lur ulteriura via da furmaziun.

Fotografia agiuntada:

da sanestra: Gion Lechmann (manader da l'Uffizi per la furmaziun media-superiura, gestiun dal project), Lucius Hartmann (president da la Societad svizra da las magistras gimnasialas e dals magisters gimnasials), Philippe Benguerel (rectur da la Scola chantunala grischuna, presidi da la direcziun dal project), cusseglier guvernativ Jon Domenic Parolini (schef dal Departament d'educaziun, cultura e protecziun da l'ambient) ed autras persunas directivas dals gimnasis grischuns

Infurmaziuns:

• Dr. Jon Domenic Parolini, cusseglier guvernativ, schef dal Departament d'educaziun, cultura e protecziun da l'ambient
  
• Dr. Gion Lechmann, manader da l'Uffizi per la furmaziun media-superiura

Las dumondas vegnan coordinadas dad Yvonne Brigger, responsabla per la communicaziun dal Departament d'educaziun, cultura e protecziun da l'ambient, tel. +41 81 257 44 66 (cuntanschibla da las 13.30 fin las 14.30), e‑mail Yvonne.Brigger@ekud.gr.ch

Responsabladad: Departament d'educaziun, cultura e protecziun da l'ambient