Il chantun Grischun extenda vinavant sia purschida da prestaziuns administrativas digitalas. Ultra da quai datti en l'administraziun chantunala plirs projects per applitgar l'intelligenza artifiziala.
Il ePortal (eportal.gr.ch) è ina plattafurma digitala per la populaziun e per l'economia che pussibilitescha in access simpel e segir a prestaziuns administrativas digitalas. Il november 2024 ha il chantun Grischun mess en funcziun questa plattafurma online cun var ina dunsaina da servetschs digitals. Il pli savens è vegnì emplenì dapi lura il formular per prolungar il termin da la decleraziun da taglia per las entradas e per la facultad. Passa 22 000 giadas è la dumonda correspundenta vegnida inoltrada en furma digitala.
Ussa è cuntanschida la proxima finamira intermediara: La purschida è vegnida augmentada sin totalmain 25 servetschs. Tranter quels èn per exempel formulars per inoltrar propostas per l'urari u per dumandar permissiuns per persunas estras. Il ePortal vegn amplifitgà pass per pass. Uschia pon vegnir rimnadas cuntinuadamain experientschas preziusas che pon vegnir resguardadas per sviluppar vinavant la purschida. Quai ch'è fitg impurtant: Novs servetschs administrativs digitals vegnan controllads d'expertas ed experts interns ed externs per la segirezza d'informatica per eruir eventualas largias da segirezza. Il support per il ePortal è cuntanschibel da tuttas uras, durant 7 dis l'emna. Uschia vegnan las utilisadras ed ils utilisaders sustegnids independentamain dal temp e dal lieu.
Il conto d'utilisaziun gratuit vegn sviluppà vinavant
Er l'uschenumnà eConto vegn gia duvrà savens. 1500 persunas èn sa registradas dapi ch'il ePortal è vegnì lantschà il november 2024. Il conto d'utilisaziun gratuit ha l'avantatg, che datas depositadas pon vegnir surpigliadas per utilisar servetschs. Tschertas prestaziuns administrativas digitalas, sco per exempel la eMidada, pretendan in eConto.
Il eConto vegn ussa sviluppà vinavant cun stgalims da segirezza supplementars, per ch'i saja pussaivel da crear in'uschenumnada identitad electronica cun capacitad da supportar squitsch – ina cumprova d'identitad segira en il spazi digital. Uschia vegnan las utilisadras ed ils utilisaders en il futur per exempel a pudair emplenir ed inoltrar lur decleraziun da taglia sur il ePortal. La finamira a lunga vista è quella da pussibilitar a la populaziun ed a l'economia da duvrar pli e pli savens las prestaziuns administrativas davent da chasa, en biro u sin viadi, senza esser lià ad uras d'avertura dal spurtegl u a la via postala.
Intelligenza artifiziala: analisa dal potenzial, projects da pilot e furmaziuns supplementaras
L'intelligenza artifiziala (IA) crescha rasantamain: L'administraziun chantunala dal Grischun persequitescha intensivamain quest svilup. Per chattar ora, nua che las tecnologias da la IA pon vegnir applitgadas en moda raschunaivla, laschan ils chantuns Grischun, Son Gagl, Turgovia, Appenzell Dadens, Appenzell Dadora ed il Principadi da Liechtenstein far in'analisa dal potenzial cuminaivla. Actualmain vegni examinà, nua ed en tge dimensiun che la IA po porscher ina plivalur. Mo soluziuns che pon vegnir applitgadas cun responsabladad e che servan al bainstar general vegnan silsuenter examinadas pli detagliadamain. Ils resultats duain gidar a sviluppar vinavant ils process administrativs ed a meglierar sistematicamain ils servetschs a favur da la populaziun e da l'economia. Grazia a la stretga collavuraziun pon ils tschintg chantuns ed il Principadi da Liechtenstein barattar experientschas e profitar da sinergias.
Supplementarmain a l'analisa interchantunala dal potenzial vegnan realisads projects da pilot en l'administraziun chantunala dal Grischun per obtegnair experientschas davart il diever e davart la realisaziun tecnica da tecnologias da la IA. In grond giavisch da l'administraziun chantunala èsi d'accumpagnar las collavuraturas ed ils collavuraturs ad emprender ed a trair a niz l'intelligenza artifiziala generativa. Novas purschidas da furmaziun supplementara ed in mussavia sensibiliseschan per in tractament segir e cun responsabladad – per exempel cun ChatGPT, cun Copilot u cun utensils sumegliants.
Dapli infurmaziuns:
- Qua vai tar il ePortal: eportal.gr.ch.
- Dumondas e respostas detagliadas davart il ePortal ed ulteriuras infurmaziuns davart il tema intelligenza artifiziala en l'administraziun chantunala: digitalverwaltung.gr.ch.
Fotografias agiuntadas:
1) Maletg simbolic ePortal; © Canva/Pexels
2) Screenshot ePortal
Infurmaziuns:
Marc Heuberger, manader dal Post da stab Administraziun digitala, tel +41 81 257 32 02 (cuntanschibel da las 10.00 fin las 12.00), e‑mail Marc.Heuberger@dfg.gr.ch
Responsabladad: Departament da finanzas e vischnancas / Post da stab Administraziun digitala
Tschintg dumondas e respostas davart il ePortal
- Tge avantatgs ha il ePortal per mai sco utilisadra u utilisader?
Il ePortal (eportal.gr.ch) è ina plattafurma digitala centrala per la populaziun e per l'economia. Ella pussibilitescha in access simpel e segir a servetschs administrativs digitals.
- Tge servetschs chat jau sin il ePortal?
La purschida da prestaziuns dal chantun Grischun per la populaziun e per l'economia cumpiglia oz plirs tschient servetschs – blers da quels anc sin palpiri. Els vegnan digitalisads pass per pass ed adempleschan las autas pretensiuns da segirezza e da la protecziun da datas. La purschida da servetschs sin il ePortal vegn cumplettada pass per pass.
- Tge avantatgs hai jau, sche jau avrel in eConto?
Sche Vus avris in eConto, pudais Vus utilisar servetschs che premettan tschertas indicaziuns persunalas u che pretendan in stgalim da confidenza pli aut. Las indicaziuns arcunadas en Voss profil vegnan surpigliadas per utilisar ils servetschs. Cun il eConto survegnis Vus ultra da quai ina chascha da brevs digitala. Las funcziunalitads vegnan extendidas cuntinuadamain.
- È il eConto gratuit?
Gea, Vus pudais avrir gratuitamain in eConto. Tscherts servetschs pudais Vus dentant utilisar – sco gia oz al spurtegl – er en il spazi digital mo cun pajar ina taxa.
- Tge fa l'administraziun chantunala, per che mias datas sajan segiras e protegidas?
Ils novs servetschs administrativs digitals vegnan examinads tenor auts standards da segirezza. Quai èn: in'analisa dal basegn da protecziun, sche necessari in concept davart la segirezza da las infurmaziuns e davart la protecziun da datas (concept ISDS) ed ina controlla tras expertas ed experts da segirezza.