A chaschun d'in inscunter da lavur ha la Regenza grischuna oz retschavì la Regenza songagliaisa a Passugg. La scuntrada ha purschì l'occasiun per discutar divers temas politics d'interess cuminaivel.

La Regenza songagliaisa è vegnida retschavida oz suentermezdi da la Regenza grischuna a la EHL Scola d'hotellaria a Passugg. Al timun da la delegaziun songagliaisa è stada la presidenta da la Regenza Susanne Hartmann. Plinavant èn stads da la partida las cusseglieras guvernativas Laura Bucher e Bettina Surber, ils cussegliers guvernativs Beat Tinner, Marc Mächler, Christof Hartmann e Bruno Damann sco er il chancelier Benedikt van Spyk. L'inscunter dad oz dat perditga da las relaziuns excellentas tranter ils dus chantuns.

Barat politic multifar
En il decurs dals discurs politics èn las duas regenzas sa barattadas davart numerus temas d'interess cuminaivel. Uschè han els tranter auter tractà ina pussaivla participaziun dal chantun Grischun al «Memorial svizzer per las victimas dal naziunalsocialissem». Ultra da quai han las Regenzas discutà davart l'analisa dal potenzial cuminaivla per ils champs d'applicaziun da l'intelligenza artifiziala sco er davart la renconuschientscha da la galaria d'emprova Hagenbach sco instituziun da perscrutaziun d'impurtanza naziunala.

Ultra dal discurs da lavur è stada sin il program er ina guida tras la Scola d'hotellaria Passugg. Sco finiziun ha gì lieu ina tschaina cuminaivla da las duas delegaziuns.

Fotografias agiuntadas:

Il president da la Regenza Marcus Caduff beneventa la presidenta da la Regenza songagliaisa Susanne Hartmann a Passugg

Las delegaziuns da las Regenzas davant la EHL Scola d'hotellaria a Passugg

Infurmaziuns:

President da la Regenza Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch