Sin agen giavisch dat Richard Atzmüller giu la direcziun da l'Uffizi per il svilup dal territori per ils 31 da mars 2026. Cun 62 onns surpiglia el ina funcziun senza incumbensas directivas che daventa libra en l'uffzi. La Regenza sustegna il giavisch da Richard Atzmüller da concepir en moda persunala la vita e la lavur er sur in nov «model d'artg». Quest model da l'administraziun chantunala è d'ina vart accordà cun ils basegns persunals e minimescha da l'autra vart la perdita directa d'enconuschientschas pervia dal pensiunament da persunas decisivas.

Richard Atzmüller lavura dapi 30 onns tar l'Uffizi per il svilup dal territori (UST). L'onn 1997 ha el surpiglià la direcziun da la partiziun Planisaziun directiva, mez 2007 è el daventà vicemanader da l'uffizi e mez 2012 ha el la finala surpiglià la direcziun da l'uffizi. «Manar il UST dal Grischun è ina incumbensa variada, pretensiusa e captivanta. L'onn 2026 èsi in bun mument per surdar la batgetta: L'emprima etappa da la Lescha federala davart la planisaziun dal territori (LPT1) vegn realisada; l'applicaziun da la legislaziun davart las abitaziuns secundaras è etablida, il Plan directiv Energia è en la runda finala, la plattafurma eBau è implementada, la realisaziun da la segunda etappa da la Lescha federala davart la planisaziun dal territori (LPT2) è concepida ed il team dal UST è tut en tut posiziunà bain. Ils proxims 4 onns ston però vegnir occupadas da nov funcziuns impurtantas pervia da pensiunaments. Quai duai vegnir fatg d'ina nova direcziun; ord vista dal manaschi n'èsi betg raschunaivel, che la persuna che banduna l'uffizi fetschia quai», manegia Richard Atzmüller.

Il UST realisescha – en collavuraziun cun la Confederaziun, cun las regiuns e cun las vischnancas – las finamiras ed ils princips legals da la planisaziun dal territori. Las var 35 collavuraturas e collavuraturs accumpognan las planisaziuns localas e regiunalas, dattan las permissiuns per edifizis ordaifer la zona da construcziun (EOZ), sviluppan la planisaziun directiva chantunala, stgaffeschan il rom per la digitalisaziun da plans ed elavuran las basas da planisaziun per il svilup dal territori. La direcziun da l'uffizi vegn elegida da la Regenza ed è suttamessa directamain al schef dal Departament d'economia publica e fatgs socials (DES).

Garantir il transfer d'enconuschientschas
«Jau hai fitg grond respect envers il giavisch persunal da dar giu la direcziun da l'uffizi avant il pensiunament ordinari», accentuescha il president da la Regenza Marcus Caduff, schef dal Departament d'economia publica e fatgs socials. Questa planisaziun prospectiva pussibilitescha da sviluppar soluziuns da manaschi – gist en in temp, nua ch'igl è grev da chattar collavuraturas e collavuraturs qualifitgads. Il «model d'artg» ch'è vegnì sviluppà da nov, cumenza exactamain qua: Cun cuntinuar l'engaschament en ina funcziun spezialisada vegni pussibilità da transferir en moda ordinada las enconuschientschas. La plazza sco manader da l'Uffizi per il svilup dal territori vegn publitgada proximamain.

«Model d'artg» – in model da l'avegnir
Ils proxims 10 onns vegn circa in terz da las manadras e dals manaders dals posts da servetsch da l'administraziun chantunala pensiunà en moda regulara. «Da chattar vias e meds che permettan da surdar a temp ed en moda ordinada las enconuschientschas e la responsabladad, vegn ad avair ina gronda impurtanza per nossa organisaziun, è dentant a medem temp ina sfida», di il manader da l'Uffizi da persunal, Marco Blumenthal. Il «model d'artg» na permetta betg mo da surdar la posiziun directiva a temp ed en moda ordinada ad ina successiun, mabain stgaffescha er perspectivas per persunas talentadas che han interess da surpigliar ina incumbensa directiva.

Fotografia agiuntada:

Infurmaziuns:

• President da la Regenza Marcus Caduff, schef dal Departament d'economia publica e fatgs socials, tel +41 81 257 44 60 (cuntanschibel da las 09.30 fin las 10.30), e‑mail Marcus.Caduff@dvs.gr.ch
• Richard Atzmüller, manader da l'Uffizi per il svilup dal territori, tel. +41 81 257 23 21 (cuntanschibel da las 10.00 fin las 11.30), e‑mail Richard.Atzmueller@are.gr.ch

• Marco Blumenthal, manader da l'Uffizi da persunal, tel. + 41 81 257 45 06 (cuntanschibel da las 09.30 fin las 10.30), e‑mail Marco.Blumenthal@pa.gr.ch

Responsabladad: Departament d'economia publica e fatgs socials