La Regenza dal chantun Grischun renconuscha la situaziun dad Adam Quadroni sco cas da direzza ed ha decidì, ch'ella desistada pretender ils daners che Adam Quadroni debitescha anc al chantun. Per in pajament d'indemnisaziun ad Adam Quadroni n'exista nagina basa legala. Quai è resultà d'ina examinaziun. La Regenza ha ultra da quai prendì enconuschientscha da la petiziun «Giustia per Adam Quadroni – indemnisaziun ussa!» e na po betg ademplir las pretensiuns da quella.
Adam Quadroni ch'è daventà enconuschent ad ina vasta publicitad pervia dals cas dal cartel da construcziun ch'èn vegnids tractads da la Cumissiun federala da concurrenza (CUMCO), ha inoltrà al chantun – tras ses represchentant legal – dapi l'onn 2019 pliras giadas extragiudizialmain pretensiuns d'indemnisaziun en ina summa da set cifras. Sco motivs per far valair l'indemnisaziun èn vegnidas inditgadas singulas acziuns da la polizia ed il plazzament per motivs da provediment sco er la presumziun, che Adam Quadroni na saja betg vegnì resguardà cura ch'i èn vegnidas surdadas incumbensas publicas. Da vart dad Adam Quadroni è vegnì pretendì il pajament d'ina indemnisaziun extragiudiziala tras il chantun. La Regenza ha examinà las dumondas da pajament.
I manca la basa per il pajament d'ina indemnisaziun
Ils scleriments cumplessivs dal chantun han mussà, ch'i n'exista ni sin plaun naziunal ni sin plaun chantunal ina basa legala che giustifitgass il pajament d'ina indemnisaziun cun daners da taglia dal chantun ad Adam Quadroni. L'indemnisaziun d'in whistleblower tras in actur statal dischavantagià fiss ultra da quai in novum en l'entira Svizra. Durant la sessiun da primavaira 2024 ha il Cussegl naziunal plinavant refusà in'ulteriura giada da stgaffir in rom legal per proteger whistleblowers.
Cun sias infurmaziuns ha Adam Quadroni contribuì ina part impurtanta per restabilir la concurrenza. Questas infurmaziuns han la finala purtà al resultat, ch'il chantun Grischun è en il fratemp en ina buna situaziun per prevegnir a cunvegnas da surdada. Per questa situaziun ha la Regenza exprimì gia pli baud ses respect e ses engraziament envers Adam Quadroni.
Renconuschientscha d'ina situaziun persunala da direzza
La Regenza renconuscha la situaziun persunala dad Adam Quadroni sco cas da direzza. Per quest motiv ha ella – appreziond la situaziun generala – concludì da desister d'incassar las pretensiuns finanzialas avertas ch'il chantun fa valair envers el. Quai vegn fatg en concordanza cun las disposiziuns dal dretg da finanzas. Quellas permettan al chantun da relaschar en cas da direzza il pajament da daners che vegnan anc pretendids. Da quantifitgar l'autezza da la renunzia da las pretensiuns vegni desistì, perquai che las datas ed ils dretgs persunals èn degns da protecziun.
La Regenza na po betg ademplir las pretensiuns da la petiziun
Ils 4 da december 2024 è vegnida inoltrada a la Regenza la petiziun «Gistadad per Adam Quadroni – indemnisaziun ussa!» ch'è vegnida sustegnida da tut en tut 4231 persunas. Da las 4231 sutsegnadras e sutsegnaders derivan 725 persunas dal Grischun, 2909 persunas dal rest da la Svizra e 597 persunas da l'exteriur.
Cun la petiziun pretendan las sutsegnadras ed ils sutsegnaders da pajar ad Adam Quadroni ina indemnisaziun en ina summa dad otg cifras. Motivada vegn questa pretensiun d'ina vart pervia d'in tractament apparentamain nuschaivel dad Adam Quadroni tras las autoritads sco er pervia da la necessitad da cumpensar ils debits ch'èn resultads ad el sin basa dals cas da dretgira. Da l'autra vart haja ses whistleblowing chaschunà pajaments d'enclegientscha da milliuns francs al chantun tras las firmas da construcziun e tras las vischnancas involvidas e procurà per respargns en connex cun acquisiziuns futuras.
Ils scleriments legals dal chantun han mussà, ch'i n'exista nagina basa legala per pretender ina indemnisaziun. I na vegn perquai betg dà suatientscha al giavisch da la petiziun.
Il chantun ha realisà las recumandaziuns da la Cumissiun parlamentara d'inquisiziun dapi l'onn 2023
Las mesiras che la Cumissiun parlamentara d'inquisiziun (CPI) Cartel da construcziun (rapport parzial 2019 e rapport parzial 2021) ha recumandà per eliminar ils deficits constatads en l'organisaziun ed en ils process interns dals posts da servetsch pertutgads da l'administraziun chantunala (en spezial Polizia chantunala, Autoritad per la protecziun d'uffants e da creschids, Uffizi da construcziun bassa), èn vegnidas realisadas cumplettamain il zercladur 2023. Dapi l'october 2022 exista in post d'annunzia independent per whistleblowing che serva a l'annunzia anonima d'abus en il sectur da las acquisiziuns publicas. Tenor la CUMCO vala il program da controlla dal chantun Grischun per ina meglra renconuschientscha da cunvegnas da submissiun, actualmain sco exemplaric en l'entira Svizra.
Agiunta:
Decisiun da la regenza
Dumondas da las medias:
Las dumondas vegnan coordinadas daSeraina Hostettler, responsabla per la communicaziun dal Departament da finanzas e vischnancas, e‑mail Seraina.Hostettler@dfg.gr.ch
Rapports e rapports finals:
Nus renviain a las suandantas communicaziuns a las medias
Responsabladad: Regenza