La Regenza dal chantun Grischun incumbensescha l'uniun «Translationale Medizin an Grenzflächen» (TMG) da realisar projects da perscrutaziun en il sectur da la medischina translaziunala. Quest engaschament duai gidar essenzialmain a rinforzar ed a diversifitgar la structura economica sco er a promover la forza innovativa dal chantun en quest champ prospectiv.

Cun il project «Medischina translaziunala dals organs da barriera» vegn realisà a Tavau in ulteriur project decisiv da la Strategia chantunala d'innovaziun.Cun questa strategia, ch'è vegnida deliberada l'onn 2019, ha la Regenza stgaffì la basa per rinforzar sistematicamain la politica d'innovaziun dal chantun. En il Program da la Regenza 2025–2028 conferma ella sia intenziun da promover la diversificaziun da la structura economica e da promover la forza innovativa.

In term impurtant è vegnì cuntanschì l'onn 2021 cun la fundaziun dal center da perscrutaziun CERC (Climate Change, Extremes, and Natural Hazards in Alpine Regions Research Centre) a Tavau. En collavuraziun cun la SPF Turitg e cun l'Institut federal per la perscrutaziun da guaud, naiv e cuntrada WSL è il CERC vegnì stabilì al WSL Institut per la perscrutaziun da la naiv e da las lavinas SLF cun la finamira da far frunt a las sfidas da fenomens extrems da l'aura e dal clima en regiuns alpinas. L'emprima perioda da prestaziun da 4 onns è vegnida terminada cun success la fin da l'onn 2024.

Medischina dals organs da barriera: perscrutaziun cun relevanza globala
La medischina translaziunala ha la finamira da transferir enconuschientschas scientificas en applicaziuns praticas. Il nov project a Tavau sa concentrescha sin la perscrutaziun dals organs da barriera biologics – pia dals organs che han ina colliaziun cun l'intern dal corp e cun il mund exteriur. Els pussibiliteschan l'interacziun dal corp cun ses ambient, per exempel il pulmun cun l'aria da respirar, in implantat cun l'oss u il tract digestiv cun il nutriment.

Las inflammaziuns cronicas da quests organs da barriera chaschunan trais quarts da tut ils mortoris sin l'entir mund. Per ils sistems da sanadad èn questas inflammaziuns ina chargia considerabla – er en Svizra.

Per sclerir per l'emprima giada scientificamain e cumplessivamain, pertge ed en tge moda e maniera ch'il clima alpin influenzescha positivamain la sanadad umana, duai tranter auter vegnir etablida ina «cohorta da populaziun» specifica ed unica. I sa tracta qua d'ina gruppa da persunas che vegn tschernida a maun da caracteristicas cuminaivlas, sco per exempel la vegliadetgna, il domicil u il status da sanadad. Questas persunas vegnan observadas durant in tschert temp per identifitgar musters medicinals ed uschia obtegnair novas enconuschientschas per la prevenziun, per la diagnosa e per la terapia.

Trair a niz sinergias ed expertisas en il chantun Grischun
L'uniun TMG sa cumpona d'instituziuns da perscrutaziun renumadas dal chantun Grischun. Quai èn tranter auter la fundaziun AO, l'Institut svizzer da retschertgas davart allergias ed asma (ISRA), CK-CARE, Davos Biosciences, Cardio-CARE, la Clinica autalpina Tavau, la Scola auta spezialisada dal Grischun, il Centre Suisse d'Electronique et de Microtechnique (CSEM), l'Ospital chantunal dal Grischun, l'Ospital da Tavau SA e l'Universitad da Turitg. Questas instituziuns pon inoltrar projects da perscrutaziun che vegnan valitads, priorisads e finanziads da l'uniun. Cun lur expertisa scientifica gidan ellas a sviluppar metodas da tractament innovativas per malsognas dals organs da barriera. Tras l'utilisaziun cuminaivla da l'infrastructura fitg chara resultan plinavant effects da sinergia.

Niz economic e social
L'uniun TMG è vegnida incumbensada cun la constituziun e cun la direcziun dal project «Medischina translaziunala dals organs da barriera». A partir dal matg 2025 vegnan stgaffidas en il chantun var 30 novas plazzas da lavur d'auta qualificaziun. A vista mesauna duai il project manar al svilup da patentas, a dretgs d'utilisaziun ed a la fundaziun da novas interpresas. Uschia duain vegnir stgaffidas plazzas da lavur supplementaras ed augmentada la valurisaziun regiunala.

Il project rinforza la posiziun dal Grischun sco lieu impurtant per la perscrutaziun ed il svilup innovativ. Supplementarmain vegnan spetgads effects positivs per il sectur da furmaziun e da turissem. La Regenza sustegna il project «Medischina translaziunala dals organs da barriera» en il rom d'ina incarica da prestaziun dad 8 onns cun en media 3,6 milliuns francs per onn.

Fotografias agiuntadas:

Campus da medischina a Tavau @ Clemens Güdel, CK-Care (Christine Kühne – Center for Allergy Research and Education)

Infurmaziuns:

• President da la Regenza Marcus Caduff, schef dal Departament d'economia publica e fatgs socials, tel. +41 81 257 44 60 (cuntanschibel da las 11.00 fin las 12.00), e‑mail Marcus.Caduff@dvs.gr.ch
• Reto Bleisch, manader da l'Uffizi per economia e turissem, tel. +41 81 257 23 77 (cuntanschibel da las 11.00 fin las 12.00), e‑mail Reto.Bleisch@awt.gr.ch