En connex cun la superaziun da la stgarsezza d'energia annullescha la Regenza tut las mesiras per spargnar energia en l'administraziun chantunala. Concretamain sistescha ella las mesiras da l'uschenumnada «fasa 1». Las mesiras previsas per ina «fasa 2» u «fasa 3» eran vegnidas annulladas gia ils 5 da december 2022. Sche la stgarsezza d'energia s'engrevgiass danovamain en l'avegnir, vegnissan las singulas fasas puspè messas en vigur pass per pass. Tenor las valitaziuns dal Cussegl federal è la situaziun dal provediment d'energia actualmain stabila e main precara che al cumenzament da l'enviern. La Confederaziun recumonda perquai als chantuns, a las citads ed a las vischnancas d'adattar lur mesiras per spargnar energia.

Sco pli gronda patruna en il Grischun ha l'administraziun chantunala surpiglià sia funcziun d'exempel e prendì, sco pretendì, mesiras per spargnar energia. Uschia ha ella contribuì sia part al respargn d'energia. Grazia al sustegn da las collavuraturas e dals collavuraturs èsi stà pussaivel da spargnar ils ultims mais cun las mesiras realisadas var 9 pertschient energia cumpareglià cun la medema perioda da l'onn precedent. Las mesiras realisadas mussan ch'igl è pussaivel da spargnar ina quantitad considerabla d'energia cun relativamain pauca lavur e paucs custs. La gronda part po vegnir spargnada tar il basegn d'energia per stgaudar. Qua ha l'enviern miaivel sustegnì las stentas generalas da spargnar energia. En cas d'ina stgarsezza d'energia po mintga pertschient, cunzunt en il sectur da l'electricitad, esser decisiv per mantegnair la segirezza dal provediment. En il senn da l'optimaziun energetica vegn l'Uffizi da construcziun auta ad examinar er en l'avegnir mesiras adequatas per spargnar energia ed a realisar talas en moda efficazia.

L'onn 2021 ha la Regenza engaschà l'anteriur cusseglier guvernativ Claudio Lardi sco cumissari da la Regenza per la vischnanca da Roveredo. El ha surpiglià las incumbensas e las funcziuns formalas dal president communal ed ha manà l'administraziun communala (communicaziun a las medias dals 28 da schaner 2021). Suenter las elecziuns communalas ha el sustegnì la nova suprastanza durant in curt temp transitoric en dumondas che pertutgavan la gestiun e l'organisaziun da la vischnanca (communicaziun a las medias dals 22 da december 2022). La Regenza ha prendì enconuschientscha dal rapport final dal cumissari da la Regenza per la vischnanca da Roveredo e da la terminaziun da ses mandat per la fin da mars 2023.

En il rapport final orientescha Claudio Lardi davart sia activitad e resumescha sias enconuschientschas sco cumissari da la Regenza durant il schaner 2021 fin il mars 2023. El conferma che las autoritads communalas actualas ageschian onestamain e cun respect vicendaivel. Ils uffizials han cumprovà ch'els adempleschan lur responsabladad politica envers la populaziun da Roveredo, ch'els observan las reglas elementaras per l'activitad da las autoritads e ch'els ageschan en l'interess dal bainstar general. Tenor il rapport final na dovri naginas mesiras da surveglianza pli. Perquai desista la Regenza d'ulteriuras mesiras da surveglianza ed engrazia a Claudio Lardi per ses ordvart grond engaschament a favur da la chaussa.

La Regenza ha garantì a la firma Markenkern SA ina contribuziun chantunala da maximalmain 37 296 francs per il project preliminar «Framework cumpetenzas digitalas da basa en il Grischun». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Per il project èn budgetads custs da circa 99 500 francs.

La finamira dals purtaders dal project (Markenkern SA, exigo SA, GastroGraubünden, SASGR, ibW, jugend.gr) è quella d'introducir ina plattafurma digitala «Framework cumpetenzas digitalas da basa en il Grischun» sco er purschidas d'infurmaziun e d'interacziun nunbirocraticas per la populaziun interessada. La plattafurma e las purschidas duain surpigliar la funcziun d'in sistem ecologic da basa per l'ambient digital en il Grischun, quai cun l'intent da pussibilitar e da facilitar l'access a cumpetenzas digitalas da basa. La finamira dal project preliminar è quella d'elavurar in concept che serva sco basa per elavurar il «Framework cumpetenzas digitalas da basa en il Grischun».

Ulteriuras infurmaziuns: https://grdigital.digital

La Regenza ha approvà la revisiun parziala da la planisaziun locala che la vischnanca da Tavau aveva concludì ils 28 da november 2021. Uschia stgaffescha ella las premissas da la planisaziun d'utilisaziun per construir ina nova pista che maina dad «Usser Isch» giu «Carjöl». D'ina vart è quai ina pussaivladad attractiva e directa per skiunzas e skiunzs pli versads per turnar giu Tavau Plaz, da l'autra vart vegn distgargiada la pista «Gämpen» che maina per gronda part sin ina via forestala fin giu la val. Plinavant duai la nova pista diriger ils freeriders en secturs ordaifer il guaud. Percunter vegn l'anteriura pista «Ischalp – veglia spunda da slalom FIS» relaschada da la zona da sport d'enviern. Questa pista, che manava fin giu la val e che na vegn betg pli duvrada, vegn attribuida da nov a l'areal da guaud. Quai en il rom d'ina emplantaziun cumpensatorica da 10 232 meters quadrat.

Stadi actual

Visualisaziun dal stadi previs

©InfraDigital

Las spazzachaminas ed ils spazzachamins grischuns lavuran a partir dal 1. da matg 2023 per ina tariffa per ura pli auta. Da nov pon ellas ed els pretender 84 francs per ura per lur prestaziuns. La Regenza ha approvà ina revisiun parziala correspundenta da l'Ordinaziun tar la Lescha davart la protecziun cunter incendis. Cun augmentar la tariffa per 5,2 pertschient s'adatta il Grischun als ulteriurs chantuns da la Svizra Orientala cun monopol da spazzachamins sco er a la chareschia ch'è s'accumulada. L'ultima giada era la tariffa vegnida adattada il favrer 2017.

La Regenza ha mess en vigur per il 1. d'avrigl 2023 las regulaziuns per eleger las commembras ed ils commembers da la Dretgira superiura e da la Dretgira da giustia. Per la medema data èn ultra da quai vegnidas messas en vigur las disposiziuns che permettan a l'autoritad da s'organisar, uschia ch'ella po cumenzar il 1. da schaner 2025 cun sia funcziun da giurisdicziun. Las ulteriuras disposiziuns da la Refurma da las dretgiras 3 entran en vigur pli tard a differentas datas.