La Regenza ha deliberà ils sbozs per duas revisiuns parzialas da la Lescha davart il sustegn da persunas basegnusas. Ina da las revisiuns tracta la repartiziun dals eventuals custs da l'agid social da Svizras e Svizzers cun moda da viver nomada che utiliseschan ina plazza da staziunament en ina vischnanca dal chantun. En connex cun l'autra revisiun duain las regulaziuns davart la restituziun da las prestaziuns d'agid social vegnir surlavuradas.

Tar omaduas revisiuns sa tracti da l'agid social, per il qual las vischnancas èn responsablas. Las disposiziuns legalas correspundentas sa chattan en la Lescha da sustegn chantunala. Quellas ston vegnir adattadas per realisar dus giavischs. Las consultaziuns davart las duas revisiuns separadas tematicamain han lieu a medem temp.

Revisiun concernent Svizras e Svizzers cun ina moda da viver nomada
Igl è in giavisch da la Regenza, che las Svizras ed ils Svizzers cun ina moda da viver nomada possian conservar lur tradiziun e cultura. Per garantir ina purschida suffizienta da plazzas da staziunament duain las vischnancas pertutgadas dar impuls. Perquai duai vegnir introducida en la Lescha davart il sustegn da persunas basegnusas ina nova regulaziun: Ils eventuals custs da l'agid social che resultan en connex cun ina plazza da staziunament per Svizras e Svizzers cun moda da viver nomada, vegnan repartids correctamain sin tut las vischnancas dal chantun. Uschia vegni evità, che las vischnancas, che disponan d'ina plazza da staziunament resp. porschan ina tala, na vegnian betg engrevgiadas tuttina.

Per il sustegn economic (agid social) è da princip quella vischnanca cumpetenta, en la quala las persunas basegnusas abitan u sa trategnan. Per Svizras e Svizzers cun moda da viver nomada è responsabla quella vischnanca per pajar l'agid social en cas d'ina eventuala basegnusadad correspundentamain, en la quala sa chatta la plazza da staziunament utilisada.

Revisiun concernent la restituziun da prestaziuns d'agid social
Il Cussegl grond ha incumbensà la Regenza en la sessiun d'october 2021 da preschentar ina missiva cun in sboz da la lescha per annullar l'obligaziun da restituir las prestaziuns d'agid social per persunas giuvnas creschidas durant l'emprima scolaziun ed examinescha ultra da quai la regulaziun vertenta concernent l'obligaziun da restituir las prestaziuns d'agid social per tut las persunas basegnusas. Per realisar questa incumbensa ha il chantun elavurà ina proposta da regulaziun. Las Directivas da la Conferenza svizra da l'agid social (COSAS) han servì per quest intent sco agid d'orientaziun.

Uschia duain prestaziuns da l'agid social ch'èn vegnidas retratgas, vegnir restituidas, sche las relaziuns d'entrada sa megliereschan considerablamain u sch'i resulta in augment da facultad. I dat dentant er excepziuns, numnadamain per persunas giuvnas creschidas che daventan basegnusas durant in'emprima scolaziun ed èn dependentas d'agid social. Er na duain per exempel prestaziuns da sustegn, che stattan en connex cun l'integraziun professiunala e sociala u cun in impediment, betg vegnir restituidas.

Ils documents dals projects da consultaziun pon ussa vegnir consultads
La consultaziun dura dals 7 da december 2023 fin ils 6 da mars 2024. Ils documents respectivs pon vegnir consultads sin la pagina d'internet dal chantun Grischun.

Infurmaziuns:

Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch

Responsabladad: Regenza