Ils fatgs da salvament en il chantun Grischun duain vegnir organisads da nov. La consultaziun correspundenta è averta. La Regenza vul da nov reglar ils fatgs da salvament en moda cumplessiva en in'atgna lescha. Cun il decret duain plinavant vegnir adattadas las cundiziuns generalas per las medias ed ils medis, per ils ospitals e per las organisaziuns da salvament. La finamira è quella, che mintga persuna en il chantun Grischun che sa chatta en privel, ch'è malsauna u che ha gì in accident, survegnia uschè svelt sco pussaivel l'agid optimal.
Ils ospitals publics han l'incumbensa da metter a disposiziun in servetsch da salvament sin via effizient en lur regiun da sanadad. La nova lescha precisescha las incumbensas respectivas dals ospitals publics. La Regenza duai er pudair far als ospitals prescripziuns areguard l'organisaziun da lur servetsch da salvament, sche quai è necessari per pudair garantir in servetsch da salvament effizient. Da nov vegn er reglada l'integraziun en il servetsch d'urgenza da las medias e dals medis che pratitgeschan libramain
Oz èn las disposiziuns ch'èn decisivas per ils fatgs da salvament repartidas sin differents relaschs. En l'avegnir duain ils fatgs da salvament en il chantun dentant vegnir reglads en moda cumplessiva en in'atgna lescha.
In salvament svelt e d'auta qualitad è da gronda impurtanza per il chantun muntagnard
«In salvament svelt e d'auta qualitad è da gronda impurtanza per il Grischun sco chantun muntagnard cun sias 150 vals e ses abitadis decentrals», scriva la Regenza en ses rapport tar la consultaziun. La nova organisaziun dals fatgs da salvament en il chantun Grischun avev'ins gia prendì en mira en il Program da la Regenza 2017-2020.
Ils documents da consultaziun èn ussa disponibels
La consultaziun dura dal 1. da matg 2024 fin ils 31 da fanadur 2024. Ils documents respectivs èn disponibels sin la pagina d'internet dal chantun Grischun. Ultra da quai pon els vegnir empustads per telefon (tel. +41 81 257 25 13) tar il Departament da giustia, segirezza e sanadad.
Infurmaziuns:
Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 12.00 fin las 14.00), e‑mail Peter.Peyer@djsg.gr.ch
Responsabladad: Regenza