En trais sesidas ha la Cumissiun dal Cussegl grond per ambient, traffic ed energia (CATE) predeliberà il project da la Regenza davart il Plan d'acziun Green Deal per mauns dal Cussegl grond. La missiva cumplexa è vegnida discutada intensivamain e per part en moda cuntraversa.

Sut il presidi dal vicepresident da la cumissiun Giovanni Jochum ed en preschientscha dal cusseglier guvernativ Jon Domenic Parolini, schef dal Departament d'educaziun, cultura e protecziun da l'ambient, ha la CATE predeliberà ils 5, ils 13 ed ils 19 da mars 2025 la missiva da la Regenza tar la segunda etappa dal Plan d'acziun Green Deal. En il center dal project stat ina nova lescha che regla las cundiziuns generalas da differentas mesiras per la protecziun dal clima sco er la finanziaziun da questas mesiras fin l'onn 2050 (cf. communicaziun a las medias dals 28-01-2025).

Vastas discussiuns
Suenter la decisiun unanima d'entrar en chaussa ha la CATE discutà la fatschenta durant dus dis e mez en sesidas en moda intensiva e per part cuntraversa. Correspundentamain differenzià sa preschenta il protocol che la CATE ha deliberà per mauns dal Cussegl grond: En blers puncts sustegna la cumissiun unanimamain il project, autras posiziuns restan dispitaivlas er suenter la predeliberaziun ed en connex cun intginas disposiziuns suttametta la CATE unanimamain propostas da meglieraziun al Cussegl grond.

«Promover empè da pretender» e rinforzar l'innovaziun
Il princip «promover empè da pretender» che furma la basa per il project, vegn sustegnì unanimamain da la cumissiun. La CATE è persvadida, ch'ins po uschia prestar ina contribuziun impurtanta a favur da la protecziun dal clima ed ultra da quai rinforzar l'economia locala e l'innovaziun. Differenzas considerablas restan davart la dumonda, tgeninas da las mesiras previsas che pon effectivamain contribuir cun success ad ina decarbonisaziun en il chantun resp. per tge programs da promoziun currents che l'effect duai vegnir rinforzà cun ina promoziun supplementara. Sco central giuditgescha la CATE, che la realisaziun da las mesiras vegnia survegliada cuntinuadamain e ch'i vegnia rapportà regularmain en chaussa.

La finanziaziun speziala è incontestada
La cumissiun sustegna unanimamain la finanziaziun proponida da las mesiras cun ina finanziaziun speziala per la protecziun dal clima. Tenor l'avis da la CATE garantescha quest instrument la flexibilitad necessaria, senza che la pussaivladad da decider dal Cussegl grond en il rom da sia suveranitad concernent il preventiv vegnia restrenschida. La dumonda da l'alimentaziun da questa finanziaziun speziala resta in punct dispitaivel. Tant davart il chapital da partenza sco er davart ils meds cuntinuants a favur da la finanziaziun speziala divergeschan las opiniuns per part fermamain. La cumissiun è d'accord, che la finanziaziun speziala duai vegnir examinada mintga 8 onns areguard sia necessitad, sia opportunitad e sia efficacitad.

Il Cussegl grond vegn a tractar il project en la sessiun d'avrigl 2025.

Infurmaziuns:

Giovanni Jochum, vicepresident da la Cumissiun per ambient, traffic ed energia, tel. +41 79 222 04 34 (cuntanschibel da las 14.00 fin las 16.00), e‑mail gio.jochum@gmail.com