Cun l'emprima badigliada han cumenzà oz gievgia uffizialmain las lavurs da construcziun per il nov Center da scola auta spezialisada dal Grischun. A la Pulvermühle a Cuira vegnan stgaffids – cun il nov edifizi – spazis ed infrastructuras che servan a studegiar ed a perscrutar en moda progressiva. La retratga è planisada per mez da l'onn 2028.

Bundant in onn e mez suenter ch'il pievel grischun ha acceptà il mars 2023 cun passa 80 pertschient da las vuschs la «realisaziun dal Center da scola auta spezialisada dal Grischun», ha gì lieu la gievgia l'emprima badigliada uffiziala per il project dal nov edifizi. La cussegliera guvernativa Carmelia Maissen, scheffa dal Departament d'infrastructura, energia e mobilitad, e Brigitta Gadient, presidenta dal cussegl da scola auta da la Scola auta spezialisada dal Grischun (SASGR), sco er ulteriurs giasts envidads han festivà il cumenzament da las lavurs da construcziun a la Pulvermühlestrasse a Cuira. «Cun il Center da scola auta spezialisada dal Grischun na vegn betg mo stgaffì in lieu d'identificaziun, mabain er in lieu da furmaziun, da perscrutaziun e da lavur attractiv e progressiv per las generaziuns vegnintas en il chantun», ha ditg la cussegliera guvernativa Carmelia Maissen.

Fusiun en in lieu
Las pretensiuns envers l'instrucziun da scola auta ed envers pussaivladads da collavurar e da perscrutar èn sa midadas fermamain. Per las studentas ed ils students è uschia – ultra da la purschida da studi – l'infrastructura cun furmas innovativas d'instruir, d'emprender e da collavurar, d'impurtanza adina pli gronda. «Cun il Center da scola auta spezialisada creain nus cundiziuns idealas per in barat interdisciplinar e purschain spazi per projects innovativs e per novas ideas. I resulta in lieu, nua che l'emprender, l'instruir ed il perscrutar vegnan auzads gia prest sin in nov nivel – a favur da la giuventetgna, da l'economia e da la societad dal Grischun», ha ditg Brigitta Gadient, presidenta dal cussegl da la Scola auta spezialisada. Oz è la Scola auta spezialisada repartida sin tschintg lieus en nov edifizis entaifer la citad da Cuira. Tras il nov edifizi vegnan ussa l'instrucziun e la perscrutaziun unidas en in lieu sin il nov campus per las studentas ed ils students sco er per las collavuraturas ed ils collavuraturs.

Laina or da guauds grischuns
«Il nov Center da scola auta spezialisada impressiunescha en spezial perquai che l'urbanistica, l'architectura, la structura purtanta e la persistenza vegnan tractads en moda integrala», ha explitgà l'architect chantunal Andreas Kohne. Il nov edifizi vegn planisà en moda persistenta e cun duvrar las materialias las pli adattadas duain vegnir spargnadas resursas. Uschia ha la construcziun ibrida da lain e da betun emissiuns da CO₂ bler pli bassas ch'ina moda da construcziun massiva, e stgaffescha a medem temp in'auta qualitad da preschientscha en ils locals interns. «Per la structura purtanta dal palantschieu sura vegn duvrada laina da guauds grischuns che nus avain gia acquistà», ha ditg Andreas Kohne. Quest process d'acquisiziun è vegnì documentà sco film en la part 1 e 2 da «Holzwege».

Program da construcziun concis
Il nov edifizi da la Scola auta spezialisada è in dals pli gronds projects da construcziun auta dal chantun. Per che tut las lavurs progredeschian senza problems, vegn il plazzal endrizzà e circumdà cun ina saiv entaifer las proximas emnas. Il schaner 2025 cumenzan las lavurs da stgavament, avant che las lavurs da la construcziun brutta suondan il zercladur 2025. Cun la construcziun da la fatschada duai vegnir cumenzà la primavaira 2026. Sche tut va tenor plan, vegn il nov Center da scola auta spezialisada ad esser terminà la fin da l'onn 2027. La retratga è previsa per mez da l'onn 2028. Ils custs per il project general – inclusiv la renovaziun da l'immobiglia a la Pulvermühlestrasse 68 – importan 178 milliuns francs. Il Cussegl grond ha approvà il credit d'impegn da 151 milliuns francs l'october 2022, il pievel grischun ha acceptà il project il mars 2023.

A l'emprima badigliada dad oz preceda ina lunga istorgia:

Cronica:

• Favrer 2015: Incumbensa dal Cussegl grond a la Regenza da far scleriments per construir in center da scola auta per la SASGR (l'anteriura Scola auta da tecnica ed economia [SATE] Cuira) e da suttametter al Cussegl Grond in project cun in credit da construcziun.
• 2017–2020: En ses program 2017–2020 fixescha la Regenza da promover cun prioritad in tala construcziun.
• October 2018: Il Cussegl grond approvescha la realisaziun d'in center da scola auta a la Pulvermühlestrasse a Cuira.
• November 2020: A chaschun da la votaziun dal pievel dals 29-11-2020 acceptan las votantas ed ils votants da Cuira la midada da zona e la cessiun da terren da la citad da Cuira.
• Settember 2020 – october 2021: Realisaziun d'ina concurrenza da projects selectiva da dus stgalims
• October 2021: La Regenza surdat l'incumbensa per il nov Center da scola auta spezialisada dal Grischun al team da planisaders generals dal project «Partenaris» sut la direcziun dal biro d'architectura Giuliani Hönger Architekten da Turitg. Els han gudagnà la concurrenza da projects da dus stgalims.
• October 2022: Il Cussegl grond approvescha il credit d'impegn da 151 milliuns francs per realisar il nov Center da scola auta spezialisada.
• Mars 2023: Il pievel grischun accepta cun passa 83 pertschient da las vuschs il project «Realisaziun dal Center da scola auta spezialisada dal Grischun». Il project cumpigliava in credit d'impegn da 151 milliuns francs. Las investiziuns totalas per il project general, inclusiv la renovaziun da l'immobiglia a la Pulvermühlestrasse 68, duain importar var 178 milliuns francs.
• Mars 2024: Il chantun, respectivamain l'Uffizi da construcziun auta cumpetent, inoltrescha la dumonda da construcziun a la citad da Cuira.
• Zercladur 2024: La citad da Cuira dat la permissiun da construcziun al chantun respectivamain a l'Uffizi da construcziun auta cumpetent.
• 28 da november 2024: Emprima badigliada per il nov Center da scola auta spezialisada (CSASGR)

Visualisaziuns:

Foto 2, Foto 3, Foto 4

© Giuliani Hönger Architekten SA

Agiunta:

Flyer d'infurmaziun davart la construcziun

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 13.00 fin las 14.00), e‑mail Carmelia.Maissen@diem.gr.ch
• Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 12.00 fin las 13.00), e‑mail Andreas.Kohne@hba.gr.ch

Responsabladad: Uffizi da construcziun auta

Infurmaziuns cumplementaras davart la Scola auta spezialisada dal Grischun

La Scola auta spezialisada dal Grischun (SASGR) sa basa sin in pensar dinamic e sin in agir proactiv. Cun quest mindset gida ella a concepir duraivlamain l'avegnir. Il studi e la perscrutaziun èn interdisciplinars e s'orienteschan a las sfidas praticas da l'economia e da la societad. Sias passa 2200 studentas e students scolescha ella a persunalitads fitg qualifitgadas e fidablas. La purschida da la scola auta cumpiglia studis e furmaziuns supplementaras en architectura, inschigneria da construcziun, computational and data science, digital supply chain management, information science, management, mobile robotics, multimedia production, photonics sco er turissem. En la perscrutaziun sa focussescha la SASGR sin ils temas da l'applicaziun da tecnologias futuras, dal svilup en il territori alpin e da l'agir tenor princips d'interpresa. Ella agescha er en moda participativa en laboratoris reals. La cooperaziun da tut las commembras e da tut ils commembers da la Scola auta spezialisada contribuescha a l'ulteriur svilup ed a la qualitad da questa scola.