Rundas da discussiun moderadas en las pli differentas linguas

Il Post spezialisà per la promoziun da la sanadad è il purtader dal program per il Grischun.

Femmes-Tische/Männer-Tische èn rundas da discussiun plurilinguas davart ils temas famiglia, sanadad ed integraziun. Las participantas ed ils participants discutan en ina pitschna gruppa dumondas impurtantas dal mintgadi, emprendan d'enconuscher novas persunas e survegnan infurmaziuns utilas per ellas ed els e per lur mintgadi en famiglia. Las rundas da discussiun han lieu en in ambient da confidenza – per exempel tar las participantas ed ils participants a chasa, en la biblioteca, en la scola, en il center dal di per uffants, en in local d'uniuns u da curs, en il parc u sin la plazza da giugar. La purschida sa basa sin il princip da peer-to-peer. Las moderaturas ed ils moderaturs scolads han tuttas e tuts in'atgna experientscha da migraziun. La participaziun è gratuita.

Gruppa/s en mira

Persunas cun experientscha da migraziun

Finamiras dal project

Tut las persunas interessadas – independentamain da la basa da lur furmaziun – pon profitar da las rundas da discussiun. Per quai procuran l'access nunbirocratic ed il princip da peer-to-peer.

A las rundas da discussiun survegnan las participantas ed ils participants infurmaziuns relevantas davart il sistem da la Svizra e pia access a purschidas regularas.

La participaziun a las rundas da discussiun promova l'installaziun da raits socialas ed impedescha la vita en isolaziun.

Il barat sin il medem nivel permetta a las participantas ed als participants da rinforzar lur resursas persunalas e d'augmentar lur cumpetenzas d'agir.

Las Femmes-Tische/Männer-Tische en il Grischun

• Actualmain exista ina collavuraziun cun 14 moderaturas e moderaturs, ch'èn francads localmain en las regiuns Plaun, Landquart, Plessur, Surselva u Partenz Tavau.
• Las Femmes-Tische han lieu en albanais, arab, dari/farsi, curd (badini, sorani), portugais, somali, tamil, tigrinya, tirc ed ucranais.
• Las Männer-Tische han lieu en somali, tamil, tigrinya e tirc