Purschidas da cussegliaziun e da furmaziun supplementara per canortas davart ils temas nutriment, moviment e sanadad psichica

Il process da cussegliaziun cumenza cun in discurs nunobligant e cun in'analisa da la situaziun: Ha la canorta giavischs concrets per ina furmaziun supplementara? Datti sfidas, per las qualas il team da canorta vuless chattar soluziuns? Ensemen cun ina persuna spezialisada vegn fixà il proceder e planisada la realisaziun. A la fin dal process gida la cussegliadra u il cussegliader spezialisà la canorta ad instradar ed a francar a lunga vista il tema tractà. Il Post spezialisà per la promoziun da la sanadad porscha sustegn finanzial per la cussegliaziun e per la realisaziun dal process

Gruppa/s en mira

Manadras e manaders sco er collavuraturas e collavuraturs da las canortas

Finamiras dal project

Tras l'avischinaziun individuala pon problems en la canorta vegnir prendids a maun fitg directamain. Las collavuraturas ed ils collavuraturs da la canorta vegnan rinforzads en lur abilitads e sviluppan soluziuns a lunga vista per lur sfidas en connex cun ils temas moviment, nutriment e sanadad psichica.

Grazia a las midadas positivas dal decurs dal di, a la concepziun dal local u ad autras midadas en la canorta pon ils uffants sa sviluppar optimalmain.

Cuntegns da la purschida

• Discurs nunliant per analisar la situaziun da partenza en la canorta
• Accumpagnament cuntinuà tras ina persuna spezialisada, inclusiv sustegn per francar il tema
• Lavuratoris u furmaziuns individualisadas en il team
• Sustegn finanzial tras il Post spezialisà per la promoziun da la sanadad en l'entir process (ca. 80 % dals custs totals)

Cundiziuns generalas

• Interess e motivaziun da las collavuraturas e dals collavuraturs da prender per mauns ils problems e da chattar soluziuns
• La canorta garantescha las resursas persunalas da las collavuraturas e dals collavuraturs durant il process da cussegliaziun
• Tut las collavuraturas e tut ils collavuraturs èn participads al process
• Pitschna participaziun da la canorta als custs (ca. 20 % dals custs totals)