Prevenziun da mobing en scolas

#standup porscha material d'instrucziun ed instruments per promover las cumpetenzas socialas ed emoziunalas da las scolaras e dals scolars e sustegna las scolas a sviluppar ina cultura da scola plain premura ed attenziun. Durant l'introducziun, la realisaziun e la francaziun (durada ca. 1,5 onns) vegn la gruppa da project, che sa cumpona da persunas d'instrucziun da differents stgalims, da la lavur sociala da scola e da la direcziun da la scola, accumpagnada d'ina persuna spezialisada externa. Il project cumenza sin plirs plauns (sensibilisaziun, cumpetenzas d'agir, clima da scola e da classa). La finamira è ina francaziun dal project a lunga vista. In mussavia d'agir e la plattafurma d'annunzia anonima gidan las scolas a constatar a temp cas da mobing ed ad agir.

Gruppa/s en mira

Direcziuns da scola, persunas d'instrucziun, lavur sociala da scola da la scola populara e pedagogia curativa da scola

Finamiras dal project

Il persunal da scola è sensibilisà per la tematica dal mobing e sviluppa cuminaivlamain ina tenuta da guardar e d'agir.

Las scolaras ed ils scolars vegnan rinforzads en lur cumpetenzas social-emoziunalas.

In mussavia ch'è adattà per la scola per constatar a temp mobing e per intervegnir ad ura è vegnì elavurà e tut las persunas participadas a la scola enconuschan la plattafurma d'annunzia anonima.

#standup gida a cuntanscher in clima da scola, che promova l'emprender e che augmenta il bainstar da las scolaras e dals scolars.

Cuntegns da la purschida

• Intermediaziun da la persuna spezialisada externa (accumpagnament dal process)
• Sustegn finanzial: Il Post spezialisà per la promoziun da la sanadad surpiglia in import parzial dals custs dal project (custs per la scola max. 3400 francs)
• Mintgamai in exemplar stampà dals moduls d'approfundaziun MindMatters «Mobing? – betg en nossa scola» e «Chattar e salvar amis e far part» incl. access a la versiun PDF.
• Access a furmaziuns supplementaras cun in connex tematic (p.ex. sur la SAPGR)
• Newsletter «Promoziun da la sanadad en scola»

Scolas commembras da la rait da scolas21 grischun profitan da contribuziuns finanzialas supplementaras.

Cundiziuns generalas

• Furmar ina gruppa da project e nominar ina direcziun dal project: La gruppa da project sa participescha activamain a la scolaziun ed ha avunda resursas per introducir, per realisar e per francar il project en la scola
• La direcziun da la scola sustegna il project e conceda resursas temporalas, persunalas e finanzialas
• Custs che resultan per la scola (accumpagnament extern dal process ed access a la plattafurma d'annunzia): 3400 francs
• Intenziun da francar il project a lunga vista
• Examinaziun da la participaziun a la rait da scolas21

Links