Il Post spezialisà per la promoziun da la sanadad finanziescha il project. El vegn realisà sco mandat dad adebar, il Post grischun da sanadad sexuala e planisaziun da famiglia.

L'accumpagnament da migrantas tras ina persuna spezialisada durant la gravidanza, durant la part e durant la pagliola garantescha che las dunnas hajan ina persuna da referiment constanta. Quella las po preparar il meglier pussaivel per la part e percepir a temp eventualas grevezzas. Plinavant chattan las dunnas access pli facil a purschidas da cussegliaziun e da sustegn sco la Cussegliaziun da geniturs, ed ellas fan plitgunsch diever da prestaziuns dal provediment da basa (spendreras, consultaziuns ginecologicas). Il focus dals accumpagnaments vegn mess sin il rinforzament da las resursas e sin l'autonomisaziun da las dunnas e da las famiglias.

Gruppa/s en mira

Dunnas en speranza cun ina biografia da migraziun e/u cun grevezzas psicosocialas

Finamiras dal project

Grazia al stretg accumpagnament tras ina persuna spezialisada, èn las dunnas immigradas che fan part dal project infurmadas davart purschidas da cussegliaziun e da sustegn existentas. Las dunnas vegnan rinforzadas areguard lur resursas e prendan decisiuns che promovan lur atgna sanadad e quella da lur uffant durant il temp da la gravidanza, da la part e da la pagliola. Uschia pussibiliteschan ellas a lur uffant ina partenza sauna en la vita.