Dals 17 fin ils 23 da mars 2025 organisescha la fundaziun «Dependenzas Svizra» in'emna d'acziun naziunala per ils uffants da geniturs cun problems da dependenza. En il rom da l'emna d'acziun realiseschan bleras organisaziuns ed instituziuns passa 30 acziuns en 14 chantuns. Per render pli visibel il tema sa participeschan ils Servetschs psichiatrics dal Grischun (SPGR) – ensemen cun la Crusch blaua dal Grischun, il Post spezialisà per la promoziun da la sanadad dal Grischun (sco er l'Agid per persunas dependentas dal Grischun) – a l'emna d'acziun. Els s'engaschan, per ch'ils uffants survegnian il sustegn ch'els dovran.

En Svizra creschan si approximativamain 100 000 uffants en ina chasada cun gronds problems d'alcohol u d'autras substanzas. Sch'in genitur è dependent, patescha l'entira famiglia da quai. Per ils uffants èsi savens uschia, ch'il clima famigliar è tendì, chargià da conflicts ed imprevisibel. Di per di èn els confruntads cun temas, vargugna, sentiments da culpa, malsegirezzas e betg sco ultim er cun isolaziun.

Prelecziun da cudesch cun Gian-Marco Schmid – suenter discussiun al podium

Mardi, ils 18 da mars 2025 a las 19.00, ha lieu en la Clinica Waldhaus a Cuira ina prelecziun publica cun Gian-Marco Schmid, er enconuschent sco rapper grischun «Gimma». En ses cudesch «Abschiede von Mutter» elavura el la relaziun difficila cun sia mamma ch'era dependenta d'alcohol e ch'è morta avant bundant in onn. La saira vegn cumplettada cun ina discussiun al podium davart il tema dependenzas e cun in aperitiv. I n'è betg necessari da s'annunziar per l'occurrenza.

Infurmaziuns davart la prelecziun da cudesch cun Gian-Marco Schmid (DE)

Crusch blaua dal Grischun cun cussegliaziun gratuita

Durant l'emna d'acziun respundan las persunas spezialisadas da la Crusch blaua dal Grischun tut las dumondas davart il tema «Uffants da geniturs cun problems da dependenza». La cussegliaziun per uffants, giuvenils, confamigliars, persunas directamain pertutgadas sco er per persunas d'instrucziun e persunas spezialisadas vegn purschida da glindesdi, ils 17 da mars 2025, fin venderdi, ils 21 da mars 2025, mintgamai da las 11.00 fin las 14.00, per telefon (081 252 43 37) u per e-mail (beratung@blaueskreuz-gr.ch).

Infurmaziuns davart la cussegliaziun gratuita tras la Crusch blaua dal Grischun (DE)