Senza zutger tras il matg cun l'acziun «MAYbe Less Sugar» 2025
Il consum sur mesira da zutger agiuntà è in problem per la sanadad publica e pertutga mintga segunda persuna. Il mais da matg vul l'acziun «MAYbe Less Sugar», che vegn manada da diabètevaud, render attent la populaziun a quest tema. En il center stattan quest onn spaisas preparadas sez. Il diever da zutger daventa transparent ed i vegn duvrà main zutger. Il zutger agiuntà è omnipreschent. Schebain ch'el è ina funtauna d'energia, è il zutger che vegn agiuntà a las victualias savens nunnecessari. El po schizunt esser nuschaivel per la sanadad, sch'el vegn consumà smesiradamain. In consum da zutger sur mesira augmenta la ristga da malsognas sco il diabetes dal tip 2, las malsognas dal cor e da la circulaziun, caries e corpulenza (Alliance Alimentation & Santé, 2021). Mintga persuna consumescha en media passa 100 grams zutger per di – pur u agiuntà en las pli differentas furmas. Quai è bler dapli che la quantitad recumandada: L'Organisaziun mundiala da la sanadad (WHO) recumonda da consumar maximalmain 50 grams zutger per di – ideal èn schizunt main che 25 grams. Tenor la WHO duessan uffants, confurm a lur vegliadetgna, consumar anc main zutger. Fin a la vegliadetgna da 3 onns na duai vegnir consumà insumma nagin zutger agiuntà.
Calcular il consum da zutger individual
Ma quant zutger agiuntà consumain nus insumma? I n'è gnanc uschè simpel da chattar ora quai. Sin maybeless-sugar.ch chattais Vus in calculatur gratuit che As gida a calcular Voss consum persunal da zutger agiuntà. Tgi che sa participescha il matg, ha ultra da quai la pussaivladad da sa participar a la lottaria da premis attractivs.
Damain zutger grazia a spaisas fatgas en chasa
Nus savain che biscuits, limunadas e pastizarias cuntegnan zutger. Ma savevas Vus, ch'er products sco ketchup, pizza pronta, charn setga, schambun e schizunt schuppas finidas cuntegnan zutger zuppà? Sche nus na faschain betg attenziun, surpassain nus uschia facilmain la dosa da zutger quotidiana recumandada. Chapir las valurs nutritivas sin las etichettas dals products e savair, co preparar sez mangiativas, ans gida da betg crudar en questas «traplas da zutger». Quai èn sfidas, a las qualas l'acziun «MAYbe Less Sugar» fa frunt il matg 2025 cun recepts simpels, cun tips pratics, cumpetiziuns, videos, conferenzas, stans e bler auter pli. Curt: L'acziun «MAYbe Less Sugar» gida a reducir cun gust e plaschair il consum da zutger.
Material d'instrucziun
Las persunas d'instrucziun chattan sin maybeless-sugar.ch ina survista da different material d'instrucziun davart il tema zutger.
Ulteriuras planisaziuns d'instrucziun en connex cun il tema zutger datti qua:
Purtada d'ina gronda rait
L'acziun MAYbe Less Sugar vegn manada da diabètevaud en collavuraziun cun diabetessvizra e cun var 70 partenarias e partenaris. L'acziun ha la finamira da cuntanscher in vast public e d'effectuar ina midada persistenta da las disas d'alimentaziun.